Almatyda Naýryz meıramyna arnalǵan merekelik is-sharalar jalǵasýda: konsertter, jármeńkeler men mádenı baǵdarlamalar uıymdastyrylýda.

Qalanyń negizgi alańdary kún saıyn án men mádenı baǵdarlamalardy unatatyndar úshin basty tartý núktelerine aınalýda. Munda konserttik qoıylym, teatrlandyrylǵan kórinister ótip, qolóner jármeńkesi men ınteraktıvti aımaq jumys isteıdi.

24 naýryz Abaı alańynda shamamen 7 saǵatqa sozylǵan konserttik baǵdarlama ótti. Onyń aıasynda «Nauryz Open Air» uıymdastyrylyp, «Steppe Sons» toby men IGIGAI oryndaýshysy óner kórsetti. Sondaı-aq dástúrli jáne zamanaýı janrlardy toǵystyrǵan «Tórlet, Naýryz!» baǵdarlamasy usynyldy. Keshki ýaqytta sahnaǵa «Aldaspan» ujymy shyǵyp, baǵdarlamany «Qazaqsha terapıa» atty teatrlandyrylǵan rýhanı-mýzykalyq kesh qorytyndylady.

Qala turǵyndary men qonaqtary merekelik is-sharalarǵa belsendi qatysyp, otbasylarymen jáne dostarymen birge ýaqyt ótkizip, óz áserimen bólisýde.

«Ártúrli alańdarǵa baryp kórýge tyrysamyz — munda erekshe atmosfera bar. Barlyǵy óte unaıdy, barshańyzdy Naýryz merekesimen quttyqtaımyz», — dedi qala turǵyndary Lev Iýrkovskıı men Ksenıa Vasıleva.

«Naýryzdyń buryn sońdy mundaı aýqymda atap ótilgenin esime túsire almaımyn. Barlyǵy jan-jaqty oılastyrylyp, shynaıy kóńilmen uıymdastyrylǵan», — dep qosty almatylyq Sáýle Ishanova.

Merekelik is-sharalarǵa sheteldik qonaqtar da erekshe qyzyǵýshylyq tanytýda.

«Biz de óz elimizde Naýryzdy atap ótemiz, biraq mundaı aýqymdy kútpedik. Birneshe kúnnen beri túrli alańdarǵa baryp júrmiz — bári óte ádemi ári erekshe», — dep bólisti Túrkıadan kelgen stýdentter Zehra, Týıche jáne Azra.

Qalada Naýryz merekesine arnalǵan is-sharalar erteń de jalǵasady. Kelesi konsert Abaı alańynda 25 naýryz saǵat 15:00-den 20:00-ge deıin ótedi.