Óńirlik komýnıkasıalar qyzmetinde ótken brıfıń barysynda «Almaty qalasynyń Otbasyn qoldaý ortalyǵy» KMM-niń qala turǵyndaryna daǵdarysty eńserip, otbasyn saqtaýǵa qalaı kómektesip jatqanyna mysal keltirdi. Ortalyqtyń dırektory mindetin atqarýshy Aqmoljan Zarıpovtyń aıtýynsha, olar kómek kórsetip qana qoımaı, otbasylyq baılanysty da qalpyna keltirip, azamattardyń ómir súrý sapasyn arttyrýǵa da atsalysady.

«Bizdiń maqsatymyz – otbasyna daǵdarystan shyǵýǵa kómektesip, ony áleýmettik qundylyq retinde saqtaý», – deıdi ol.

Kórnekti mysaldyń biri – jańa týǵan náresteden bas tartqan jas anamen júrgizilgen jumys. Psıhologıalyq qoldaý men súıemeldeýdiń nátıjesinde áıel raıynan qaıtyp, balasyn qaıtaryp alyp, ony óz betinshe tárbıeleýge kiristi. Sonymen qatar, Ortalyq áleýmettik jáne medısınalyq máselelerdi sheshýge de járdemdesedi. Máselen, Almaty qalasynyń bir turǵynyna kórý qabileti boıynsha múgedektik rásimdeýge kómektesip, sonyń arqasynda ol tıisti memlekettik tólemder men em alýǵa múmkindik alǵan.

Al basqa jaǵdaıda kópbalaly otbasyǵa balanyń múgedektik tobyn kúsheıtýge járdem berilip, bul memlekettik qoldaýǵa qoljetimdilikti keńeıtti. Jumyspen qamtý baǵyty da mańyzdy oryn alady. Ortalyqtyń kómegimen kópbalaly ana kútýshi-tárbıeshi bolyp jumysqa ornalasty. Áleýmettik qolaısyzdyqtyń aldyn alý – negizgi baǵyttyń biri. Ortalyq polısıa, bilim berý men medısınalyq uıymdarmen birlesip, aqparattyq naýqandar men oqytý is-sharalaryn da ótkizedi.

«Keńes berýden bastap súıemeldeýge deıingi keshendi tásil nátıjedli ekenin kórip otyrmyz. Adamdar qazir júıege senim artyp, kómekke júginip jatyr», – deıdi spıker.