Almatyda «Zamanaýı bilim berýdiń tórt qyry» atty tanystyrylym ótti. Sıfrlandyrý jáne jasandy ıntellekt jyly aıasynda «Keleshek mektepteri» ulttyq jobasymen salynǵan bilim ordalarynyń jumys barysy kórsetildi.
Tehnologıa men dástúr úndestigi
Terekti men Qarasý shaǵyn aýdandaryndaǵy jańa mektepterde bilim berý úrdisi tolyq sıfrlandyrylǵan. Mundaǵy basty erekshelik – «Aqyldy kıiz úı» jobasy. Bul ortalyqta STEM baǵyty ulttyq kodpen ushtasqan: robottar asyq atyp, arqan tartyssa, jasandy ıntellekt kómegimen ulttyq naqyshtaǵy buıymdar daıyndalady. Sonymen qatar, oqýshylardyń nazaryn smartfonnan ulttyq oıyndarǵa aýdaratyn «Gadjetsiz kún» jobasy iske qosylǵan.
Jańa mektepterdiń basty ereksheligi – bilim berýdegi kreatıvti tásilder. Máselen, Terekti shaǵyn aýdanyndaǵy №213 mektepte dástúrli oqý úrdisi tolyq sıfrlandyrylǵan. Kabınet esikterindegi QR-kodtar arqyly muǵalimderdiń jetistikterimen tanysýǵa, al arnaıy kórmelerden oqýshylardyń robototehnıka salasyndaǵy jobalaryn kórýge bolady. Mundaǵy «Gadjetsiz kún» bastamasy balalardy ulttyq oıyndarǵa baýlı otyryp, olardyń áleýmettik daǵdylaryn damytýǵa baǵyttalǵan.
Al Qarasý shaǵyn aýdanyndaǵy №218 mektepte qurylǵan «Aqyldy kıiz úı» – STEM baǵyty men ulttyq salt-dástúrdiń naǵyz toǵysqan núktesi. Bul keńistikte robottar asyq atyp, arqan tartyssa, jasandy ıntellekt kómegimen lazerlik tehnologıalar arqyly ulttyq buıymdar jasalady.
Aqbulaq pen Samǵaý shaǵyn aýdandaryndaǵy №154 jáne №217 mektepterde jaratylystaný ǵylymdaryn oqytýdyń múldem jańa formaty engizilgen. «Ǵylymı sıntez aımaqtarynda» (Science Fusion Zone) hımıa, bıologıa jáne geografıa pánderi arasyndaǵy shekara joıylyp, oqýshylar pánaralyq baılanys arqyly kúrdeli máselelerdi sheshýdi úırenedi. Sondaı-aq, «DANALYQ TIME» jáne «Professıa LAB» sıaqty arnaıy zerthanalar oqýshylardyń jeńil ónerkásip pen bıotehnologıa salasyndaǵy alǵashqy kásibı qadamdaryn jasaýyna jaǵdaı jasaıdy. Bul baǵyt oqýshylardyń tek teorıalyq bilim alyp qana qoımaı, bolashaq mamandyǵyn mektep qabyrǵasynan bastap sanaly túrde tańdaýyna septigin tıgizedi.
Almaty qalasyndaǵy oqýshy ornynyń tapshylyǵy, ásirese qarqyndy damyp kele jatqan Alataý aýdanynda ózekti másele bolyp qala beredi. Osy máseleni júıeli sheshý úshin «Keleshek mektepteri» jobasy aıasynda qala boıynsha 35 myń oryndyq 21 mektep salý josparlanǵan. Búgingi tańda onyń 13-i paıdalanýǵa berilse, jańa oqý jylyna deıin Alataý, Naýryzbaı jáne Túrksib aýdandarynda taǵy 8 mektep esigin ashpaq. Árbir mektep zamanaýı ınteraktıvti taqtalarmen, STEM-kabınettermen, keń kitaphanalarmen jáne qaýipsizdiktiń joǵary júıesimen (beınebaqylaý, týrnıketter, dabyl túımeleri) tolyq jabdyqtalǵan.
«Keleshek mektepteri» – bul jaı ǵana ınfraqurylymdyq joba emes, bul otandyq bilim berý salasyndaǵy jańa fılosofıa. Onyń basty maqsaty – úsh aýysymdy oqytýdy joıyp, balalarǵa jaıly ári qaýipsiz orta qalyptastyrý. Joba aıasynda ashylǵan árbir mektep sapaly bilimniń qoljetimdiligin arttyryp, oqýshylardyń ózin-ózi damytýyna, býllıngke qarsy turýyna jáne ózara syılastyq qundylyqtaryn dáripteýine múmkindik beredi.
