Almatyda qorshaǵan ortaǵa uqypty qaraıtyn mádenıet qalyptastyryp, turǵyndardy ekologıalyq is-sharaǵa tartýdy kózdeıtin «Taza sana» ekologıalyq bastamasy bastaldy. Joba týraly Óńirlik komýnıkasıalar qyzmetinde ótken baspasóz konferensıasynda aıtyldy. Bul jolǵy bastamaǵa alǵash ret qala turǵyndaryn tazalyqty saqtap, ekologıany kútip-baptap, aıalaýǵa shaqyratyn Tazabek maskoty da qatysty.
«Taza sana» jobasynyń jetekshisi Dıana Alıevanyń aıtýynsha, bul bir rettik aksıa emes, qaldyqtardy suryptaýdan bastap qoǵamdyq keńistikterge uqypty qaraýǵa deıin turaqty daǵdy qalyptastyrýǵa baǵyttalǵan. Onyń aıasynda qalada aýla tazalaý senbilikteri, jaǵalaýlar men qoǵamdyq aýmaqtardy tazalaý, sondaı-aq turǵyndarǵa arnalǵan ekologıalyq mını-dárister men ınteraktıvti is-sharalar ótpek.
«Qalada qaldyqty jınap, ony qaıta óńdeýge jiberetin núkteler ashylyp, eriktiler men jastar uıymdary oǵan belsene atsalyspaqshy. Jobanyń áleýmettik jelilerinde atqarylǵan jumystyń nátıjesin kórsetý úshin «buǵan deıingisi men keıingisi» deıtin formatta materıal jarıalanady», - dep aıtty ol.
Negizgi baǵyttyń biri — balalar men jasóspirimdermen jumys isteý. Olarǵa arnap qalalyq eko-lager uıymdastyrylyp, qatysýshylar ekologıa týraly bilim alyp qana qoımaı, ony is júzinde qoldana alady. Baǵdarlamaǵa ınteraktıvti sabaqtar, aksıalarǵa qatysý, qaldyqtardy bólek jınaýdy úırený men óz ekologıalyq bastamalardy ázirleý de kirdi.
Tazabek maskoty ekologıalyq mádenıettiń jarshysy bolady: ol túrli aksıaǵa qatysyp, turǵyndarmen, ásirese jastarmen baılanys ornatyp, qoqys tastamaý, qaldyqtardy suryptaý men qalaǵa uqypty qaraý sıaqty qarapaıym, biraq mańyzdy erejelerdi árkimniń esine salyp otyrmaq.
Joba Almatynyń İshki saıasat basqarmasynyń qoldaýymen júzege asady. Uıymdastyrýshylardyń aıtýynsha, basty maqsat — tazalyqqa jaýapty bolýdy úıretetin jańa qalalyq mádenıetti qalyptastyrý eken.
Bastamaǵa nıet bildirgenderdiń barlyǵy qatysa alady. İs-sharalar kestesi jobanyń áleýmettik jelilerinde jarıalanyp, olar sol jerde Tazabektiń belsendiligin baqylap, ekologıa týraly paıdaly aqparat ala alady.
