Almatyda 19 sáýirde toǵyzynshy Almaty Half Marathon ótip, oǵan álemniń 44 elinen 10 000-nan astam jelaıaq qatysty. Aýqymdy sporttyq is-shara dástúrli túrde Qazaqstandaǵy iri júgirý maýsymynyń shymyldyǵyn túrip, qalanyń halyqaralyq sporttyq týrızm ortalyqtarynyń biri retindegi mártebesin taǵy bir márte rastady.
Bıyl jartylaı marafon sheteldik qatysýshylar sany boıynsha rekord ornatty: jarysqa 800-den astam sheteldik sportshy qatysty. Ásirese, Reseı, Qyrǵyzstan jáne Ózbekstan elderinen kelgen jelaıaqtar sany kóp boldy. Sonymen qatar Qytaı, AQSH, Ulybrıtanıa, Ýkraına, Belarýs jáne Eýropa, Azıa, Amerıka men Taıaý Shyǵystyń basqa da elderinen jarys jolyna shyqty.
Uıymdastyrýshylar — «Birinshi bolý batyldyq» korporatıvtik qorynyń málimetinshe, jyl saıyn qatysýshylar aýqymy keńeıip, marafon álemniń túkpir-túkpirinen júgirý áýesqoılaryn basyn qosatyn mańyzdy alańǵa aınalyp keledi.
Sporttyq saıyspen qatar, is-shara aıasynda «Taza Qazaqstan» jalpyulttyq bastamasyna oraı ekologıalyq aksıa da uıymdastyryldy.
Jarys baǵyty boıynda jáne márege jetý aımaǵynda qaldyqtardy bólek jınaýǵa arnalǵan arnaıy oryn uıymdastyrylyp, ekologıalyq mazmundaǵy ınteraktıvti aımaqtar jumys istedi. Jınalǵan qaıta óńdeletin qaldyqtar EcoNetwork seriktesiniń qoldaýymen óńdeýge jiberildi.
Uıymdastyrýshylar qorshaǵan ortaǵa túsetin salmaqty azaıtýǵa aıryqsha kóńil bólip, bir rettik materıaldardy qoldanýdy qysqartyp, baspa ónimderiniń bir bóliginen bas tartty. Sonymen birge, turaqty ári jaýapty tutyný mádenıetin engizýge basymdyq berildi.
Marafon aıasynda «Teplo» qaıyrymdylyq bastamasy da ótkizilip, qatysýshylar qaldyrǵan jyly kıimder jınalyp, suryptalyp, muqtaj jandarǵa tabystaldy.
Almaty qalasy sport basqarmasynyń habarlaýynsha, mundaı aýqymdy sharalar buqaralyq sportty damytýǵa ǵana emes, qoǵamda ekologıalyq mádenıetti qalyptastyrýǵa da zor yqpal etedi. Bul — «Taza Qazaqstan» bastamasynyń negizgi maqsattarymen tolyq úndesedi.
Uıymdastyrýshylar qatysýshylardyń jaılylyǵyn da nazardan tys qaldyrmady: márege jetý aımaǵynda ana men balaǵa arnalǵan arnaıy bólme jasaqtalyp, bólek jáne ınklúzıvti sanıtarlyq aımaqtar qarastyryldy.
Almaty Half Marathon Almaty qalasy ákimdiginiń qoldaýymen ótti.
