Almatynyń Jetisý aýdanynda «Móldir bulaq» aksıasy aıasynda turǵyndardy, eriktilerdi jáne qalalyq qyzmet ókilderin biriktirgen senbilik ótti.
Senbilik Palladın jáne Táttibekov kóshelerinde júrgizildi. Tazalyq jumystaryna turǵyndar, kásipkerler, aýdan ákimdigi apparatynyń qyzmetkerleri men qalalyq basqarma ókilderi qatysty. Sondaı-aq, aýdandyq Ardagerler keńesi ókilderi de belsendilik tanytty.
Ózen jaǵalaýlary men arnalary tazartylyp, oǵan irgeles aýmaqtar retke keltirildi.
Senbilikke 30 birlik arnaıy tehnıka, onyń ishinde júk kóligi men tıegishter jumyldyryldy. Shamamen 30 tonna qoqys jınalyp, shyǵaryldy.
Jetisý aýdany ákiminiń orynbasary Janasyl Sabyruly aksıa qatysýshylaryna alǵys bildirip, turǵyndardyń belsendiligin joǵary baǵalady.
«Apta saıyn ótetin «Móldir bulaq» aksıasy aıasynda Palladın jáne Táttibekov kósheleri mańyndaǵy ózen arnalary tazartyldy. Jaqyn mańdaǵy úılerdiń myńǵa jýyq turǵyny, komýnaldyq qyzmetkerler men ákimdik qurylymdarynyń ókilderi senbilikke qatysty. Dástúrli túrde bastamalarymyzdy qoldap júrgen eriktiler men aǵa býyn ókilderine alǵys bildiremiz. Qala tazalyǵyn saqtaý men tártipti nyǵaıtýǵa baǵyttalǵan osyndaı aksıalarǵa atsalysý úshin turǵyndardy áleýmettik jelilerimizdi qadaǵalap, belsendi qatysýǵa shaqyramyz», – dedi ol.
