Almaty oblysynda úsh kúnge sozylǵan «Tazalyq kúnderi» aksıasyna 39 myńǵa jýyq óńir turǵyny qatysyp, týrısik baǵyttardaǵy demalys oryndarynan 760 tonnadan astam qoqys jınady. Búgin óńir basshysy Marat Sultanǵazıev Qaskeleń shatqalynda ótken senbilik barysynda úsh kún boıy tazalyq jumystaryna belsendi qatysqan azamattarǵa alǵysyn bildirdi.
Qorytyndy sharada aksıaǵa erekshe úles qosqan azamattar men uıymdar túrli nomınasıalar boıynsha marapattaldy. Atap aıtqanda, Jambyl aýdanynyń týmasy Asylym Kósherbaı «Eń belsendi jas qatysýshy», Alataý qalasynyń turǵyny Rıza Saýyrbaeva «Eń belsendi egde jastaǵy qatysýshy», Qarasaı aýdanyndaǵy «GOGO CENTRAL ASIA» birlestiginiń dırektory Aleksandr Orlanov «Eń belsendi ekovolonter» atandy. Balqash aýdanynyń turǵyny Baqytjan Hamzın «Eń taza aýla» nomınasıasyn ıelendi.
Sonymen qatar, Eńbekshiqazaq aýdanyndaǵy Avat aýyly «Eń belsendi aýyl», Raıymbek aýdany Qaınar aýylyndaǵy Raıymbek batyr kóshesi «Eń taza kóshe», Uıǵyr aýdanyndaǵy «Sharyn» memlekettik ulttyq tabıǵı parki «Eń belsendi ujym» bolyp tanyldy. İle aýdany «Eń belsendi aýdan» atansa, Qonaev qalasyndaǵy «Kóshpendiler qalashyǵy» «Eń taza týrısik nysan», al Kegen aýdanyndaǵy «MERGEN HOLDING» JSHS «Eń belsendi bıznes ókili» retinde marapatqa ıe boldy.
Oblys ákimi aspan men jer astasqan, qaraǵaıly alqapqa oranǵan Qaskeleń shatqaly – óńir turǵyndary men qonaqtary jıi keletin kórikti mekenderdiń biri, osyndaı tabıǵı aımaqtardyń tazalyǵyn saqtaý – búgingi aksıanyń basty maqsattarynyń biri ekenin atap ótti.
«Memleket basshysy Qasym-Jomart Toqaevtyń bastamasymen qolǵa alynǵan «Taza Qazaqstan» ekologıalyq baǵdarlamasy tek senbilikke shyǵý emes. Bul – adam jan dúnıesiniń, aqyl-oıynyń da tazarýy. Mundaı sharalar kúndelikti ómirimizge enip, ádetimizge aınalýy kerek. Osyǵan oraı úsh kúndik demalysta “Tazalyq kúnderin” jarıalaǵan edik. Ásirese týrısik nysandardyń tazalyǵy basty nazarda boldy. Bul jumystardy aldaǵy ýaqytta da jalǵastyramyz», – dedi Marat Sultanǵazıev.
Senbilikter óńirdiń týrısik áleýeti joǵary aımaqtaryn qamtydy. Atap aıtqanda, Kólsaı jáne Qaıyńdy kólderi, Sharyn shatqaly, Túrgen shatqaly, Esik kóli, Qapshaǵaı sý qoımasy, Balqash kóliniń jaǵalaýy, Kúrti aýmaǵy, Qaskeleń shatqaly jáne ózge de tanymal baǵyttarda sanıtarlyq tazartý, qoqys shyǵarý, abattandyrý jáne kógaldandyrý jumystary júrgizildi.
Máselen, Qarasaı aýdanynda 140 tonna, Kegen aýdanynda 113 tonna, Uıǵyr aýdanynda 28 tonnaǵa jýyq, İle aýdanynda 82 tonna, Alataý qalasynda 71 tonna, Eńbekshiqazaq aýdanynda 173 tonna, Balqash aýdanynda 21,5 tonna, Raıymbek aýdanynda 20 tonna, Qonaev qalasynda shamamen 22 tonna, Talǵar aýdanynda 58 tonna, Jambyl aýdanynda 36 tonna qoqys shyǵaryldy.
Aksıaǵa júzdegen arnaıy tehnıka jumyldyryldy, nátıjesinde týrısik baǵyttar men eldi mekenderde sanıtarlyq tazartý, abattandyrý jáne kógaldandyrý jumystary keshendi túrde júrgizildi. Sondaı-aq, 13 myńnan astam aǵash kósheti otyrǵyzyldy.
Aıta keteıik, «Tazalyq kúnderi» aksıasy óńirdiń ekologıalyq jaǵdaıyn jaqsartýmen qatar, turǵyndardyń tabıǵatqa degen jaýapkershiligin arttyrýǵa jáne týrısik aımaqtardyń tartymdylyǵyn saqtaýǵa baǵyttalǵan.
