Búgin Almaty oblysyndaǵy  Kúrti sý qoımasynda aýqymdy senbilik ótti. Oǵan aýyl turǵyndary, jastar, eńbek ujymdary men eriktiler qatysty. 800-ge tarta adam kózdiń jaýyn alatyn Kúrtiniń aınalasynan 5 tonnaǵa jýyq qoqys jınady. 

Úsh kúndik demalysta óńirdegi týrısik nysandardyń tazalyǵyna erekshe den qoıylǵan. «Tazalyq kúni» aksıasy «Taza Qazaqstan» ekologıalyq baǵdarlamasy aıasynda jalǵasyp jatyr. Kúrti sý qoımasy aty ańyzǵa aınalǵan «Qyz Jibek» kórkem fılmi arqyly halyqqa keń tanylǵan meken. Tarıhı aımaq qazir qaıta jandanyp, týrıser jıi keletin demalys ornyna aınalǵan. Bul jerge kúnine 1500-2000-ǵa jýyq saıahatshy keledi. Sondyqtan tumsa tabıǵattyń tazalyǵy basty nazarda. Búgingi senbilikke oblys ákimi Marat Sultanǵazıev te atsalysyp, ekologıalyq mádenıetti saqtaýdyń mańyzyna toqtaldy. 

«Almaty oblysynda qyzyqtap-kóretin tabıǵaty erekshe nysandar kóp. Ózen-kól, taý-qyratymen qosa jazyq dalasy da janǵa jaılylyq syılaıdy. Al İle aýdanyna kelgen qonaq darhan dalanyń keremetine kýá bolady. Qazirgi tańda Kúrti sý qoımasy úlken tanymaldyqqa ıe bolyp, týrıserdiń súıikti mekenine aınalǵan. Sondyqtan aýmaqtyń taza ári jaıly bolýy mańyzdy», – dedi óńir basshysy.  

Aıta keteıik, «Tazalyq kúni» aksıasy oblystaǵy tanymal týrısik baǵyttardyń bárinde qyzý júrgizilýde. Atap aıtqanda, 
Kegen aýdany: Kólsaı, Qaıyńdy kólderi;  Uıǵyr aýdany: «Sharyn» memlekettik ulttyq tabıǵı parki; Eńbekshiqazaq aýdany: Esik kóliniń jaǵalaýy; Jambyl aýdany: Úńgirtas aýylyndaǵy «Jer kindigi» týrısik nysany; Raıymbek aýdany: Shalkóde jaılaýy jáne Tuzkól kóliniń jaǵasy; Qonaev qalasy: «Almaty–Óskemen» tasjoly boıy men «Kóshpendiler qalashyǵy» aýmaǵy; Talǵar aýdany: Talǵar ózeniniń boıy; Balqash aýdany:  Jıdeli aýyldyq okrýginde ornalasqan «Zavıdovo» týrısik kesheni;  İle aýdany: Pervomaı toǵandary, «Sokol» sporttyq-tehnıkalyq kesheni, «Rybaskaıa ýsadba» demalys orny, «Tortuga» demalys bazasy jáne «Dubai Resort» akvaparki; Alataý qalasy: «Eńbek» jáne «Zarechnyı» shaǵyn aýdandary. Oblys boıynsha búgingi tazalyq jumystaryna  12 myńǵa jýyq adam qatysyp, 135 arnaıy tehnıka jumyldyryldy. Nátıjesinde 205 tonnaǵa jýyq turmystyq qaldyq jınalyp, arnaıy polıgonǵa shyǵaryldy. 

«Keń baıtaq jerimizdiń kórkin saqtaý – árqaısymyzdyń mindetimiz. Búgin senbilikke qatysyp, sulý mekenniń sánin ketirgen qoqystardy jınadyq. Munda otbasymyzben jıi kelip turamyz. Kózdiń jaýyn alatyn tabıǵat jaýharyn qorǵaý –barshamyzdyń ortaq jaýapkershiligimiz», – dep atap ótti
senbilikke qatysqan Aqshı aýylynyń turǵyny Móldir Toǵaeva. 

«Tazalyq kúni» aksıasy erteń, ıaǵnı 3 mamyr kúni de jalǵasyp, úsh kún boıy óńirdegi týrısik baǵyttarda júrgizilgen tazalyq sharalary qorytyndylanady.