Ońtústik Koreıadaǵy iri krıptovalúta bırjalarynyń biri — Bithumb tehnıkalyq qatelik saldarynan klıentterine shamamen $40 mlrd kóleminde bıtkoın aýdaryp jibergen.

Oqıǵa 6 aqpanda ótken jarnamalyq aksıa kezinde bolǵan. Qyzmetker júlde somasyn koreı vonymen emes, bıtkoınmen engizip, 620 myń vonnyń ornyna 620 myń bıtkoın jibergen. Nátıjesinde 249 klıent qate aýdarymdy alyp úlgergen.

Bırja qatelikti anyqtaǵan soń operasıalardyń basym bóligin keri qaıtardy. Alaıda shamamen 13 mlrd von (≈$9 mln) tolyq qaıtarylmaǵan, óıtkeni keıbir klıentter qarajatty satyp nemese shyǵaryp úlgergen.

Qarjy retteýshileri jaǵdaıdy tekserip jatyr, al parlament 11 aqpanda shuǵyl tyńdaý ótkizýdi josparlap otyr. Bithumb bul oqıǵa hakerlik shabýylmen baılanysty emes ekenin aıtyp, ishki baqylaý júıesin tolyq qaıta qaraýǵa ýáde berdi.