Jalaqy qoryna túsetin júk artty. 2026 jyldyń 1 qańtarynan jumys berýshi qyzmetkeri úshin ENPF-ke 3,5 paıyz kóleminde mindetti zeınetaqy jarnasyn tóleı bastady.
Bul ózgeris bıznestiń shyǵynyna jáne bolashaq zeınetaqy tólemderiniń qurylymyna tikeleı áser etti.
Jumys berýshi qansha tóleıdi
ENPF deregine súıensek, bıylǵy stavka 3,5 paıyz bolyp bekitildi. Ár aıdaǵy qyzmetker tabysynan osy mólsherdi jumys berýshi aýdaryp otyrady.
Júıe kezeń-kezeńmen ósip keledi: 2024 jyly – 1,5%, 2025 jyly – 2,5%, 2026 jyly – 3,5%, 2027 jyly – 4,5%, 2028 jyly – 5% bolady.
Mysal úshin: aılyǵy 300 000 teńge qyzmetker úshin aı saıyn 10 500 teńgeni jumys berýshi ENPF-ke aýdarady.
Kimderge qatysty, kimderge júrmeıdi
OPVR 1975 jyly jáne odan keıin týǵan qyzmetkerler úshin kózdelgen. Bul toptyń 1998 jylǵa deıingi eńbek ótili az nemese joq bolǵandyqtan, bolashaqta olardyń zeınetaqysy úsh bólikten turady: bazalyq (memleketten), jınaqtyq (qyzmetkerdiń 10% jarnasynan), jáne shartty-jınaqtyq (jumys berýshiniń jarnasynan).
Jumys berýshi myna sanattar úshin OPVR tólemeıdi: 1975 jylǵa deıin týǵandar, zeınetkerler, İ–İİ top múgedektigi bar azamattar, áskerı qyzmetshiler jáne olarǵa teńestirilgender. Tólemniń túsýin Memlekettik kirister komıteti baqylaıdy.
Tólem qalaı berilmek
Jumys berýshi jarnasy esebinen tólemder ómir boıy tólenedi. Alaıda azamat turaqty turý úshin shetelge ketkende nemese azamattyǵyn ózgertkende bul tólemder toqtatylady.
OPVR qarajaty qyzmetkerdiń jeke menshigine jatpaıdy, muraǵa qaldyrylmaıdy. Azamat óz jınaqtyq (10%) jarnasyn ǵana ala alady, al jumys berýshi jarnasy ENPF ishinde qaıta bólinedi.
Nege alyp tastalmady
Ótken jyly Úkimet QQS mólsherlemesin 20 paıyzǵa deıin ósirý senarıin qarastyrsa, áleýmettik salyq pen jumys berýshi jarnasyn alyp tastaýǵa bolatynyn vıse-premer Serik Jumanǵarın aıtqan. Bul arqyly jalaqy qoryna túsetin qysymdy azaıtý kózdelgen.
Keıin QQS 16 paıyz deńgeıinde bekitilgen soń, áleýmettik tólemder men OPVR-dy saqtaý týraly sheshim qabyldandy. Eńbek jáne halyqty áleýmettik qorǵaý mınıstrligi bul jarna qyzmetkerge kárilik kezeńinde qosymsha shartty-jınaqtyq tólem beredi dep túsindirdi.
2028 jylǵa deıingi keste saqtalyp tur: kelesi jyly úles 4,5% bolady, 2028 jyly 5% deńgeıine jetedi.
Bul týraly Qamshy.kz aqparat agenttigi habarlaıdy.
