Uly Jeńistiń 81 jyldyǵyna oraı Almaty oblysynyń ortalyǵyndaǵy «Ardagerler saıabaǵynda» ornalasqan Dańq memorıaly janynda jarqyn bolashaq úshin janyn pıda etken bozdaqtardy eske alýǵa arnalǵan jıyn ótti. Maqsaty – Ekinshi dúnıejúzilik soǵys ardagerleriniń erligin ulyqtaý, tyl eńbekkerlerine qurmet kórsetý, jas urpaqtyń boıynda otansúıgishtik pen tarıhı jadyny qalyptastyrý.
Jınalǵandar maıdan dalasynda sheıit bolyp, jat jerdiń topyraǵy buıyrǵan bozdaqtardy bir mınýt únsizdikpen eske aldy. Odan keıin oblys ákimi Marat Sultanǵazıev sóz sóılep, soǵysqa qatysyp, búginde aramyzda qalǵan sanaýly qart jaýyngerlerge qurmet kórsetý barshanyń qasıetti boryshy ekenin aıtty.
– Soǵys jyldary elimizden 1 mıllıon 366 myń jaýynger maıdanǵa attandy. Onyń 120 myńnan astamy Almaty óńirinen boldy. Maıdan shebinen myńdaǵan bozdaq qaıtyp oralmady. Almaty óńirinen attanyp, soǵysta eren erligimen tanylǵan 40 jaýyngerge Keńes odaǵynyń Batyry ataǵy berildi. Bul – halqymyzdyń Otan úshin janyn aıamaı, erlik pen batyrlyqtyń óshpes úlgisin kórsetkeniniń aıqyn dáleli.
Almaty oblysy ákimdigi tarapynan jyl saıyn áleýmettik, materıaldyq jáne moraldyq qoldaý sharalary júzege asyrylýda. Bıyl da qalyptasqan dástúr boıynsha Almaty oblysynan soǵysqa qatysqan 4 ardagerge 5 mıllıon teńgeden birjolǵy áleýmettik kómek berildi. Jeńiske jetý jolynda tyl eńbekkerleriniń de qosqan úlesi zor boldy. Soǵys jyldary aýyr eńbek pen zor jaýapkershilikti moıyndaryna alyp, maıdandy azyq-túlikpen, kıim-keshekpen jáne qajetti qural-jabdyqtarmen qamtamasyz etý úshin kún-tún demeı eńbek etti.
Olardyń qajyrly eńbegi Jeńisti jaqyndatqan mańyzdy kúshterdiń birine aınaldy. Búginde oblysymyzda 2 038 tyl ardageri bar. Árqaısynyń ómir joly – keıingi urpaqqa ónege, al janqıarlyq eńbegi el jadynda máńgi saqtalady, – dedi oblys ákimi.
Odan keıin óńir basshysy, oblystyq máslıhat tóraǵasy, ardagerler uıymynyń tóraǵasy, Qonaev qalasynyń ákimi, quqyq qorǵaý organdary, áskerı bólim, departamentter men basqarma basshylary, máslıhat depýtattary, tyl jáne eńbek ardagerleri, Aýǵan soǵysynyń qatysýshylary, oblys pen qalanyń Qurmetti azamattary, mekeme-kásiporyn basshylary, etnomádenı birlestikterdiń músheleri jáne jastar «Máńgilik alaýǵa» gúl sebetterin qoıyp, bozdaqtar rýhyna taǵzym jasady.
Jeńis kúni qarsańynda Marat Eleýsizuly oblys aýmaǵynda turatyn kózi tiri soǵys ardagerleriniń shańyraǵyna arnaıy baryp, Memleket basshysy Qasym-Jomart Toqaevtyń quttyqtaýyn jetkizdi.
Qonaev qalasyndaǵy merekelik shara odan ári Berdibek Soqpaqbaev atyndaǵy ortalyq saıabaqta óz jalǵasyn tapty.
Mundaǵy konserttik baǵdarlamada áskerı-patrıottyq ánder shyrqalyp, mádenıet jáne óner ujymdarynyń qoıylymdary kórermender nazaryna usynyldy. Sonymen qatar jastardyń patrıottyq aksıalary uıymdastyrylyp, qala ákimi tyl eńbekkerleriniń úıine baryp, merekemen quttyqtap shyqty.
