«Ádiletti jáne Progresıvti Qazaqstannyń Halyqtyq Konstıtýsıasy úshin!» Koalısıasy quryldy
Búgin elordada elimizdiń jetekshi qoǵamdyq-saıası kúshteri «Ádiletti jáne Progresıvti Qazaqstannyń Halyqtyq Konstıtýsıasy úshin!» atty Jalpyulttyq koalısıaǵa birikti. Onyń quramyna bes jetekshi saıası partıanyń ókilderi men mıllıondaǵan azamattyń múddesin bildiretin 300-den astam qoǵamdyq uıym endi.
Otyrysqa qatysýshylar Jańa Konstıtýsıa jobasy saıası júıe arhıtektýrasyn qoǵamnyń jańa suranysyna saı túbegeıli qaıta jańǵyrtatynyn atap ótti. Bul bıliktiń barlyq tarmaǵynyń turaqty jumysyn qamtamasyz etedi.
Májilis Spıkeri, Jalpyulttyq Koalısıa Jetekshisi Erlan Qoshanov atap ótkendeı, Jańa Konstıtýsıa – shyn máninde tarıhı qujat. Onda eń aldymen adamǵa basymdyq berilip, memlekettiń basty baılyǵy jer qoınaýyndaǵy resýrstar emes, bilimdi jas urpaq ekeni aıqyndaldy. Bul – Prezıdent qolǵa alǵan aýqymdy ózgeristerdiń altyn arqaýy. Endi ol eń joǵary konstıtýsıalyq deńgeıde bekitilýde.
«Qazaqstannyń jańa Konstıtýsıasy – osy irgeli reformalardyń shyrqaý shyńy. Bul – Prezıdentimizdiń jyldar boıǵy oı-tolǵamdarynyń jemisi. Halyqtyń muń-muqtajy, talap-tilegi men úmit-senimi ushtasqan tarıhı qujat. Sondyqtan Jańa Konstıtýsıa halyqpen birge jazylǵan – naǵyz Halyqtyq Konstıtýsıa deýge tolyq negiz bar. Biz keler urpaqqa ár azamat maqtan tutatyn, Órkendegen, Ádiletti Qazaqstandy qaldyrýymyz kerek. Bárimizdi biriktiretin osy asqaq arman. Sol armanǵa – Ádiletti ári Progresıvti Qazaqstanǵa Prezıdentimizben birge jeteıik», – dedi ol.
Óz sózinde Memlekettik keńesshi Erlan Qarın Jańa Konstıtýsıanyń mańyzyna toqtaldy: «Qazaqstan bolashaqta azamattary bilimdi, ǵylymdy meńgergen, ınovasıaǵa arqa súıegen, tehnologıasy damyǵan elderdiń qatarynda bolýǵa umtylatynyn baıqatty. Sondyqtan, bul eldiń órkendeýine jańa serpin beretin Konstıtýsıa», – dedi ol.
Sondaı-aq otyrys barysynda «Aýyl» partıasynyń Tóraǵasy Serik Egizbaev, «Aq jol» Qazaqstan Demokratıalyq partıasynyń Tóraǵasy Azat Perýashev, «Respublica» partıasynyń Tóraǵasy Aıdarbek Qojanazarov, Májilistegi Qazaqstan Halyq partıasy fraksıasynyń jetekshisi Magerram Magerramov, Májilis depýtattary, «AMANAT» partıasy fraksıasynyń músheleri Erlan Saırov, Únzıla Shapaq jáne Sergeı Ponomarev sóz sóıledi.
Sonymen qatar «AgromashHoldıngKZ» AQ Prezıdenti Dınara Shúkijanova, Respýblıkalyq advokattar alqasynyń Tóraǵasy Mádı Myrzaǵaraev, saıasattanýshy Marat Shıbutov, «Qazaq tili» halyqaralyq qoǵamynyń Prezıdenti Raýan Kenjehanuly óz ustanymdarymen bólisti.
Kezdesýge qatysýshylar Jańa Konstıtýsıa jobasy memlekettiń saıası júıesin odan ári jańǵyrtýǵa, áleýmettik kepildikterdi nyǵaıtýǵa, kásipkerlikti qoldaýǵa, ǵylymdy, mádenıetti jáne ulttyq qundylyqtardy damytýǵa baǵyttalǵan strategıalyq baǵdarǵa tolyq sáıkes keletinin atap ótti.
Sonymen qatar memleket ınstıtýsıonaldyq ózgerister jolynda mańyzdy kezeńnen ótkeni atap ótildi: «Kúshti Prezıdent – yqpaldy Parlament – esep beretin Úkimet» formýlasy nyǵaıýda, Konstıtýsıalyq Sot jumys isteýde, zańsyz shyǵarylǵan aktıvter memleketke qaıtarylýda, ulttyq resýrstardy ádil bólý qaǵıdaty kúsheıtilýde. Bul barlyq sheshim ádildik, teńdik jáne bolashaq urpaq aldyndaǵy jaýapkershilik qundylyqtaryna negizdeldi.
Jańa Negizgi zań qoǵamdaǵy tereń ózgerister men dúnıetanymy jańarǵan, memleketke joǵary talap qoıatyn jańa býynnyń qalyptasýyna jaýap retinde qabyldanǵany atap ótildi. Osy úmitterdiń ózeginde adaldyqqa, zań ústemdigine, adamnyń qadir-qasıetine degen qurmetke jáne adam quqyǵyna kepildik berýge degen suranys jatyr. Jańa Konstıtýsıa osy qoǵamdyq talaptarǵa aıqyn ári naqty jaýap beredi.
Sondaı-aq Negizgi zań jobasy qoǵammen ashyq ári aýqymdy dıalog aıasynda ázirlengeni aıtyldy. Konstıtýsıalyq komısıa jumysy jarıa túrde, tikeleı efırde jáne turaqty keri baılanys ornata otyryp júrgizildi. Osy ýaqyt aralyǵynda azamattardan, sarapshylardan, kásibı qaýymdastyqtardan jáne túrli sala ókilderinen 10 myń usynys pen ótinish kelip tústi. Olardyń árqaısysy qujatty ázirleý barysynda qaralyp, eskerilip otyrdy.
Sóz sóılegen barsha azamat osy sheshýshi kezeńde Jańa Konstıtýsıany qabyldaýdyń tarıhı mańyzyn qalyń jurtshylyq arasynda ilgeriletý úshin qoǵamdaǵy jetekshi kúshterdi biriktirýdiń mańyzyn atap ótti.
Koalısıa quramyna saıası partıalardyń ortalyq jáne óńirlik qurylymdary, respýblıkalyq qoǵamdyq birlestikter, Parlament jáne máslıhat depýtattary, ǵylymı jáne sarapshylyq qaýymdastyq ókilderi, mádenıet jáne sport qaıratkerleri, kásipodaq uıymdary, salalyq qaýymdastyqtar men jastar birlestikteri kirdi.
Jýyrda Koalısıa músheleri óńirlerde túsindirý jumysyn bastaıdy. Aldaǵy referendým qarsańynda ashyq dıalog pen azamattardyń sanaly túrde qatysýyn qamtamasyz etý maqsatynda eńbek ujymdarymen, sarapshylar qaýymymen jáne turǵyndarmen kezdesý ótkizý josparlanyp otyr. Sonyń ishinde shalǵaı eldi mekender de nazardan tys qalmaıdy. Sebebi árbir qazaqstandyq azamattyń daýysy asa mańyzdy.
Jalpyulttyq Koalısıanyń baspasóz qyzmeti
Sýretti túsirgen: Álı Ǵalym
