Ýkraına AQSH usynǵan qaqtyǵysty toqtatý josparyna eleýli ózgerister engizdi. Brıtanıalyq The Guardian basylymynyń aqparatyna sáıkes, bul týraly kelissózderge qatysqan derekkózder habarlaǵan. Bastapqyda 28 tarmaqtan turǵan qujattan Reseıdiń birqatar qatań talaptary alynyp tastaldy.
Alǵashqy nusqada Ýkraına Donbastaǵy keıbir qalalardan áskerin áketýi, armıasynyń sanyn shekteýi jáne NATO-ǵa kirmeýi kerek degen tarmaqtar bolǵan. 28 tarmaqtan turatyn bastapqy AQSH-Reseı josparyn ótken aıda Vladımır Pýtınniń arnaıy ókili Kırıll Dmıtrıev jáne Tramptyń ókili Stıv Vıtkoff jasaǵan.
Ótken jeksenbide Shveısarıada AQSH memlekettik hatshysy Marko Rýbıo, Ýkraına prezıdentiniń keńsesiniń basshysy Andreı Ermak jáne basqa ókilder qatysqan kelissózderde bul jospar qaıta jasaqtalyp, 19 tarmaqqa deıin qysqardy.
Ýkraına men Eýropa elderi kez kelgen aýmaqtyq kelissózdiń negizi qazirgi maıdan shebi bolýy kerek ekenin atap ótti.
Sondaı-aq aqparattar boıynsha, Vladımır Zelenskıı osy aptada AQSH prezıdenti Donald Tramppen kezdesýi múmkin. Kıev Eýropanyń da kelissózderge qatysqanyn qalaıdy.
