Elimizdiń Ata zańyna aýqymdy ınstıtýsıonaldyq transformasıa jasalyp jatyr. Konstıtýsıalyq reforma aıasynda respýblıkada 30 jyl boıy etnosaralyq kelisimniń negizi bolyp kelgen Qazaqstan halqy Assambleıasy (QHA) jańa memlekettik ınstıtýt – Halyq keńesine aınalady.
Konstıtýsıanyń VI bólimi Qazaqstan Halyq Keńesi dep atalyp, 70-bap, 1-tarmaǵynda «Qazaqstan Halyq Keńesi – Qazaqstan Respýblıkasy halqynyń múddesin bildiretin joǵary konsýltatıvtik organ», – degen mártebesi naqty kórsetildi.
Sondymen qatar, atalǵan qurylym jaı ǵana konsýltatıvtik, formaldy organǵa aınalmas úshin, 71-baptyń 2-tarmaǵyna onyń Quryltaıǵa zań jobalaryn engize alatyny da aıqyn jazyldy.
«Reformanyń basty jańalyǵy – «Halyq keńesi» Úkimetpen teń dárejede Parlamentke (Quryltaıǵa) zań jobalaryn tikeleı engizý jónindegi konstıtýsıalyq quqyqqa ıe bolady. Bul qoǵamdyq organnyń mártebesi keńesshi sıpattan zań shyǵarý úderisine naqty yqpal etetin sýbekt deńgeıine kóteriledi», – dep túsindirdi QR Prezıdenti janyndaǵy QSZI Strategıalyq taldaý bóliminiń bas sarapshysy Aıdana Akesına.
Sarapshynyń aıtýynsha, eger buryn Assambleıa Parlamenttegi kvotalar arqyly shekteýli ókildikke ıe bolsa, jańa ınstıtýt túrli etnıkalyq toptardyń ókilderin zań shyǵarý úderisine júıeli túrde qatystyrýdy kózdeıdi jáne memlekettik organdardyń jańartylǵan arhıtektýrasyna kiriktiriledi.
«Halyq keńesiniń» quramy 126 músheden jasaqtalyp, etnomádenı birlestikterden, máslıhattardan jáne azamattyq sektordan (árqaısysy 42 adamnan) teń kvota qaǵıdaty boıynsha quralady. Mundaı qurylym óńirlerdiń, túrli etnostardyń jáne azamattyq qoǵamnyń belsendi ókilderiniń múddelerin teńgerimdi túrde qamtýǵa múmkindik beredi.
Májilis depýtaty Maqsat Tolyqbaı reformanyń ózegi – bılikti nyǵaıtý emes, kerisinshe azamattyq qoǵamnyń rólin kúsheıtý ekenin aıtady. Sonymen qatar, Halyq keńesine respýblıkalyq referendým taǵaıyndaý týraly bastamashylyq jasaý quqyǵy beriledi.
«Jalpy, «Halyq keńesi» jańa saıası alańǵa, memlekettik sheshimderge yqpal etetin yqpaldy ortalyqqa aınalady. Eń bastysy – «Halyq keńesi» tolyqtaı ashyq qurylym bolady jáne oǵan kez kelgen azamattyń, barlyq etnostardyń, kásipkerlerdiń qatysýyna múmkindik beriledi. Usynylyp otyrǵan ózgeristerdiń túpki maqsaty – kúshti tulǵalarǵa emes, myqty ınstıtýttarǵa súıenetin memleket qalyptastyrý», – dedi depýtat.
