Almaty qalasyndaǵy Dostyq úıinde elimizdiń jańa Konstıtýsıasynyń jobasyn túsindirýge arnalǵan kezdesý ótti. Jıynǵa belgili otandyq jazýshylar men shyǵarmashylyq zıaly qaýym ókilderi, qoǵam qaıratkerleri, sondaı-aq QR Parlamenti Májilisiniń depýtattary men Konstıtýsıalyq reforma jónindegi komısıa músheleri qatysty. Qazaqstan Jazýshylar odaǵynyń tóraǵasy Mereke Qulkenov atalǵan joba qoǵamnyń múddesin eskeretinin atap ótti.
– Búgin biz el úshin asa mańyzdy másele – jańa Konstıtýsıa jobasyn talqylaý úshin jınaldyq. Ol halyqpen ashyq dıalog barysynda qalyptasyp, qoǵamnyń shynaıy múddelerin kórsetedi, – dep atap ótti spıker.
Kezdesýde Ahmet Baıtursynuly atyndaǵy Til bilimi ınstıtýtynyń dırektory Anar Fazyljan da sóz sóıledi. Ol eldiń odan ári tabysty damýy úshin jańa Konstıtýsıanyń qajet ekenin atap ótti.
– Árıne, qoldanystaǵy Negizgi zańda barlyq mańyzdy máseleler eskerilgen, azamattardyń negizgi quqyqtary men mindetteri bekitilgen. Alaıda álem bir orynda turmaıdy, sondyqtan Konstıtýsıa da bul úderisterdi kórsetýi tıis. Sonymen qatar Konstıtýsıa jobasynyń qazaq tilinde ázirlenýi asa mańyzdy. Sondaı-aq onyń búgingi tańda ártúrli jastaǵy, mamandyqtaǵy, áleýmettik jaǵdaıdaǵy adamdar arasynda keńinen talqylanýynyń mańyzy zor. Bul kóp jaıtty ańǵartady, – dedi spıker.
Jalpy, pikirtalas barysynda konstıtýsıalyq reformanyń negizgi baǵyttary, jańa Konstıtýsıa jobasynda qoǵamǵa, mádenıetke jáne shyǵarmashylyq salaǵa qatysty kózdelgen normalar, sondaı-aq azamattyq ınstıtýttardyń róli men jaýapkershiligi jóninde mazmundy pikir almasý ótti. Qatysýshylar quqyqtyq reformalardyń el damýy úshin strategıalyq mańyzyn, azamattardyń quqyqtary men bostandyqtaryn keńeıtý qajettigin, sondaı-aq sóz bostandyǵy men shyǵarmashylyq erkindikti ınstıtýsıonaldyq turǵyda nyǵaıtýdyń mańyzdylyǵyn atap ótti.
Sonymen qatar, shyǵarmashylyq qaýymdastyq ókilderi jańa Konstıtýsıa tek quqyqtyq qujat qana emes, qoǵamdyq sanany jańǵyrtýǵa, ádildik pen jaýapkershilik qaǵıdattaryn bekitýge yqpal etetin rýhanı negiz bolýy tıis ekenin aıtty.
Talqylaý qorytyndysy boıynsha qatysýshylar jańa Negizgi zań jobasynyń negizgi baǵyttary men usynylǵan reformalardy biraýyzdan qoldaıtyndaryn bildirdi.