Pavlodarda qyzyn vıdeoǵa túsire otyryp, uryp-soqqan áıelge keshirim berildi, - dep habarlaıdy Tengrinews.kz

Úsh jasar Aılındi uryp-soqqan anasyna qatysty qozǵalǵan qylmystyq is taraptardyń tatýlasýymen jabyldy.

"Pavlodar turǵyny Erjan Qasymov azamattyq nekedegi áıeline shara qoldanýdy surap, aryz jazǵan. Ol aryzynda áıeli Nurgúl Dokýovanyń úsh jasar qyzdy uryp-soǵatynyn aıtqan. Dokýovaǵa qatysty sotqa deıingi tergeý "Kámeletke tolmaǵan adamdy tárbıeleý jónindegi mindetterdi oryndamaý" babymen júrgizildi. Tergeý barysynda er adam Dokýovamen tatýlasqany jóninde ótinish túsirdi. Osyǵan baılanysty kúdiktige qatysty qylmystyq is aqtalmaıtyn negizder boıynsha toqtatyldy", - dep habarlady óńirlik polısıa departamentiniń baspasóz qyzmeti Tengrinews.kz redaksıasynyń resmı saýalyna bergen jaýabynda.

Óz balasyn uryp-soǵyp, vıdeoǵa túsirgen qatygez anaǵa qatysty is qozǵalǵany belgili. Búldirshindi anasynyń aıaýsyz uryp-soǵýy týraly vıdeo Instagram áleýmettik jelisinde jarıa bolǵan edi. Kadrlardan áıeldiń búldirshindi vıdeoǵa túsire otyryp, betinen, basynan urǵanyn kórýge bolady. Keıin tamaǵynan qysyp, jylap jatqan balanyń únin óshirgisi keledi. Áıel munysymen de toqtamaı, búldirshindi urǵylaı beredi. Kadr syrtynda "Ana, toqtat!" degen taǵy bir qyzdyń daýsy estiledi. Qyz sheshesin toqtatpaq bolady, biraq anasy onyń sózine qulaq aspaıdy.  

Keıin Pavlodarda qyzdy uryp-soqqan vıdeony taratýshy oqıǵanyń mán-jaıyn aıtyp bergen edi.

Esterińizge sala ketsek, myna vıdeo áleýmettik jelide keńinen taralyp, jurtshylyqtyń ashýyn týdyrǵan bolatyn.