Búgin «Qazaqstan» RTRK» AQ men Clearwater Documentary Inc. kompanıasynyń birlesken jobasy – «EQUUS» (Jylqy) derekti trılogıasyna qatysty memorandýmǵa qol qoıyldy. Ortalyq komýnıkasıalar qyzmetinde ótken baspasóz máslıhaty barysynda QR Aqparat jáne komýnıkasıalar mınıstri Dáýren Abaev Qazaqstan úshin bul jobanyń mańyzdy ekendigin atap ótti.

«Biz osy joba arqyly elimizdiń ımıjin kóterýge, mádenı keńistik múmkindikterin keńeıtýge jáne ǵylymı zertteý salasyn odan ári damytýǵa úles qosamyz. Túsirilimniń negizgi maqsaty – Qazaqstan jerin mekendegen ertedegi jylqylardyń ómir súrý salty men materıaldyq mádenıetin eń úzdik ǵylymı jetistikter negizinde zerdeleý», - dedi mınıstr.

Kezdesý barysynda «EQUUS» (Jylqy) halyqaralyq jobasynyń óndiristik jumystary talqyǵa salyndy. Atalmysh joba elimizdiń tarıhy men dástúrin qamtyp, kıno jáne týrızm salalaryn halyqaralyq arenadaǵy ımıjin qalyptastyrýǵa yqpalyn tıgizedi.

Túsirilim jumystary bıyl bastalady, 2018 jyly aıaqtalady jáne Qazaqstan aýmaǵynda ótedi. Oǵan qazaqstandyq kınematografıster, akterler, dýblerler, óner jáne dızaın salasyndaǵy kásibı mamandar tartylyp, kanadalyq túsirilim tobymen birlesip jumys isteıdi. Qazaqstandyq kınematografıster úshin bul mol tájirıbe ǵana emes, sonymen qatar, ǵylymı dereknama baǵytynda rýhanı-mádenı almasý bolmaq.

Sonymen qatar bul jobaǵa Kanada (CBC), AQSH (PBS), Germanıa (ZDF) jáne Fransıa (ARTE) elderiniń ulttyq aqparat taratý korporasıalary qatysady. «EQUUS» derekti trılogıasynyń rejıseri Naıobı Tompsonnyń aldyńǵy tájirıbesine súıenetin bolsaq, atalmysh serıal álemniń 50-den astam elinde mıllıondaǵan aýdıtorıa jınaıdy dep kútilýde.  

Osy oraıda, jobadaǵy birlesken áriptestik arqasynda «Qazaqstan» RTRK» AQ «Equus» derekti trılogıasyn kórsetetin halyqaralyq aqparat taratýshy  dárejesine ıe bolady.