Fransıalyq Le Monde basylymy qazaqstandyq ánshi Dımash Qudaıbergen jaıly maqala jarıalady, - dep habarlaıdy tengrinews.kz.
"Qytaılyq telejoba qazaqtyń shoýyna aınaldy" degen taqyryppen jarıalanǵan maqalada Dımash Qudaıbergenniń fransýzdyń SOS d'un terrien en detresse ánin oryndap, sensasıa jasaǵany aıtylady.
"Dımash Qudaıbergen qytaılyq Hunan TV arnasynda shyǵatyn Geshou 2017 jobasynda (burynǵy I'm a Singer) qyz-qyrkynnyń júregin jaýlap aldy. 1994 jyly týǵan qazaq Dımash Qudaıbergen fransýzsha Sos d'un terrien detresse ("Men nege kúlemin, men nege jylaımyn") ánin oryndaý barysynda sózderdi durys aıtýy asa jaqsy bolmaǵanymen, kórermenge bul kedergi bolmady, ol naǵyz ot boldy. Ol 21 qańtarda kórsetken ónerinen keıin áleýmettik jeliniń trıýmfynda", - delingen maqalada.
Sondaı-aq, "osy ýaqytqa deıin óz elinde belgili bolsa, al endi qytaı juldyzdary ishinde tanymal bolǵan" Dımash Qudaıbergen jaıynda Lam Yiceng degen 25 jastaǵy jankúıeriniń sózi keltiriledi. "Kóptegen qytaılyq Qazaqstannyń kaıda ekenin bilmegen bolsa, budan soń qazaq degenniń kim ekenin biletin boldy" deıdi jankúıer.
Maqalanyń "Xiexie barlyq máseleni sheshpeıdi" atty bóliminde avtor endigi kezeńderde Dımash Qudaıbergenniń Qytaıda hıtke aınalǵan ánderdi oryndaýshylarymen jarysqa túsetinin jazady.
"18 aqpanda Brýno Mars pen Mark Ronsonnyń Uptown Funk ánin oryndaǵan Dımash Qudaıbergen 22 sáýirde bolatyn fınalda jeńiske kol jetkeze me eken? Ol qytaı tilinde birde-bir sóz bilmeıdi, tek án oryndap bitken soń "xiexie" ("raqmet") dep qaıtalaıdy. Endi ol óte úlken belesten ótý kerek, ıaǵnı ánderi únemi jergilikti karaokede jarysa aıtylatyn qytaılyq juldyzdarmen jarysqa túsedi. Eń alǵash qytaı tilinde án aıtqanda fonetıkadan qınalǵanyn baıqaımyz, kórermenniń kózaıymyna aınalý úshin osy tilde án aıtýǵa mindetti edi. Degenmen bar máseleni sheshetin til emes", - dep jazǵan maqala avtory.
Osydan keıin qazaqstandyq ánshiniń ónerine bas ıgen taǵy bir qytaı jankúıeri - shanhaılyq jas Shen Lıngtiń sózi keltiriledi: "Onyń daýsyna tańǵalǵanym sonsha, qazir sonymen birge ýaıymdaıtyn boldym".
Avtordyń aıtýynsha, onyń Qazaqstan halqynyń sanynan (18 mıllıon) artyq qytaılyqtardyń qoldaýyna ıe bolatyny anyq. "Karerasyn jasap, bolashaqta qaltasyn qalyńdatýǵa osy da jetkilikti", - dep qorytady oıyn avtor.
Al osy maqalaǵa qatysty pikirinde ánshiniń PR-dırektory ári dosy Alpamys Sharımov Fransıadan kóptegen usynystyń túsip jatqanyn habarlady. "Rasynda da, Fransıadan kóp usynystar kelip jatyr. Fransýzdardyń qyzyǵýshylyǵy óte joǵary. Eýropadan keletin xattardyń kóbi osy elden. Jaqyn arada Fransıaǵa baryp qalýymyz múmkin. Bul ázirshe qupıa!", - dedi Sharımov.
Aıta keteıik, Le Monde - kún saıyn 364 240 danamen shyǵatyn jýrnal. Basylymnyń shtab-páteri Parıjdiń 13-shi okrýginde ornalasqan. Le Monde gazetiniń negizin Iýber Bóvom-Merı́ Sharl de Golldiń tapsyrysymen 1944 jyly qurǵan. Gazettiń birinshi sany 1944 jyldyń 19 jeltoqsanynda shyqqan. Al 1995 jyldyń 19 jeltoqsanyna bastap basylymdy onlaında oqýǵa bolady.
Eske salaıyq, aldaǵy senbide, ıaǵnı 11 naýryzda Hunan TV arnasynda Dımash Qudaıbergen I'm a Singer baıqaýynyń segizinshi kezeńinde óner kórsetedi.
