Qazirgi tańda ımamdardyń jalaqysy qaıyrymdylyqtan túsken qarajatqa tikeleı baılanysty, dep habarlaıdy Qamshy aqparattyq agenttigi Sputnik.kz saıtyna silteme jasap.
Din salasyndaǵy mańyzdy máselelerdi sheshý úshin arnaıy korporatıvtik qaıyrymdylyq qory quryldy. Bul týraly úkimet otyrysynda QR Din isteri jáne azamattyq qoǵam mınıstri Nurlan Ermekbaev málim etti.
"Elbasynyń tapsyrmasyna sáıkes arnaıy korporatıvtik qaıyrymdylyq qory quryldy. Ol Ádilet mınıstrliginde tirkeldi. Bul qordyń basty maqsattary — musylmandyq jáne basqa da kózderden túsetin qaıyrymdylyq qarajatty jınaqtaý, áleýmettik turǵydan az qamtylǵan jáne osyl toptarǵa kómek berý, qaıyrymdylyqtan túsken qarjyny jáne tapqan tabysty zaıyrly maqsattarǵa baǵyttaý", — dep málim etti Ermekbaev.
Taǵy da bir óte mańyzdy baǵyt - ımamdardy qamtamasyz etý. Mınıstrdiń aıtýynsha, qazirgi tańda ımamdardyń jalaqysy qaıyrymdylyqtan túsken qarajatqa tikeleı baılanysty. Eger úlken qalalarda ımamdardyń jaǵdaıy salystyrmaly túrde birqalypty bolsa, aýdan ortalyqtary men shalǵaı eldi mekenderde olardyń jaǵdaıy óte turaqsyz.
"Osy jaǵdaı ımamdardyń el arasyndaǵy ımıjine nuqsan keltiredi. Sebebi bul jaıtty destrýktıvti dinı aǵym ókilderi paıdalanady, ımamdardy muqatyp, olarǵa jamaǵatty qarsy qoıyp, irikti salý áreketterin jasaýda.
Jalpy, bilim men biliktiligi joǵary ımamdardy dinı turǵyda problemaly aımaqtarǵa tartý jáne shalǵaı eldi mekenderge qyzmet atqarýǵa jiberý óte qıyn bolyp ketti. Respýblıka boıynsha 150-den astam meshitte ımam múldem joq. Basqalarynda aýysý faktileri jıi kezdesedi. Búgin biz ımamdardyń jalaqysyna tikeleı búdjetten qarajat bóle almaımyz. Sondyqtan bul qor atalǵan ózekti máselelerdi sheshe alady dep úmittenemiz", — dedi mınıstr.
Qordyń quryltaıshylary - mınıstrlikke qarasty Mádenıet jáne din halyqaralyq ortalyǵy, din isteri jónindegi ǵylymı-zertteý taldaý ortalyǵy jáne Dintanýshylar kongresi. Qordyń qamqorshylar keńesi de jasaqtalypty. Olar qordyń ashyqtyǵyn qamtamasyz etetin bolady.
"Qamqorshylar keńesinde parlament depýtaty, Bas múftı, Qarjy mınıstrligi, Memleketttik qyzmet isteri jáne sybaılas jemqoryqqa qarsy is-qımyl agenttigi, "Atameken" kásipkerler palatasy, "Astana" halyqaralyq qarjy ortalynyń ókilderi jáne belgili qoǵam qaıratkerleri bar. Keńes tóraǵasy din salasyndaǵy ókiletti organnyń jetekshisi bolyp tabylady.
Sonymen birge, qordyń alqalyq atqarý organy, basqarmanyń tóraǵasy men alqa músheleri saılandy. Din salasynyń jáne qordyń maqsattarynyń mańyzdylyǵyn eskere otyryp, barlyq din salasyna jany ashıtyn adamdardy jáne kásipkerlerdi, uıymdardy qordy qoldaýǵa shaqyramyn", — dedi mınıstr.
