Túrkimenstannyń memlekettik telearnalary men radıo stansıalary budan bylaı búdjetten qarjylandyrylmaıdy, dep habarlaıdy Qamshy.kz aqparat agenttigi centralasian.org málimetine súıenip.

Túrkimenstan prezıdentiniń 7 shilde kúngi jarlyǵyna sáıkes, teleradıo habar taratý jáne kınematografıa jónindegi memlekettik komıtet sharýashylyq esepke aýdarylǵan. 2018 jyldan bastap bul salany memlekettik qazynadan qarjylandyrý birtindep toqtatylady.

Úkimettiń sheshimi boıynsha, teleradıo habar taratý júıesi jarnama arqyly túsken tabystan óz shyǵyndaryn ózderi jabady.

Qazirgi ýaqytta Túrkimenstanda memlekettik "Altyn Asyr", "Iashlyk", "Mıras", "Túrkimenstan", "Ashhabad", "Túrkimen ovazy" "Túrkimenstan sport" dep atalatyn 7 telearna jáne "Char tarapdan", "Mıras", "Ovaz" jáne "Vatan" dep atalatyn 4 radıo kanal jumys isteıdi. Bulardyń bári memleket tarapynan qarjylandyrylady.

Túrkimenstannyń memlekettik telearnalaryndaǵy baǵdarlamalardy el prezıdenti qazirgi damýǵa sáıkes kelmeıdi dep birneshe ret synaǵan.

Sholýshy: Aıgerim Taýbaı