Qazaqstanda jarty jylda 738 adam jol apatynan mert bolǵan, - dep habarlaıdy Qamshy.kz  aqparat agentigi  Qazaqstan Respýblıkasynyń Bas prokýratýrasynyń Quqyqtyq statısıka jáne arnaıy esepke alý jónindegi komıtetine silteme jasaı otyryp.
Aǵymdaǵy jyldyń 6 aıy boıynsha elimizdiń joldarynda 7127 jol-kólik oqıǵasy oryn aldy, onda 9992 adam zardap shekti, 738-i qaza tapty.Ótken jyldyń uqsas kezeńimen salystyrǵanda JKO 10,7%-ǵa, zardap shekkenderdiń 10,3%-ǵa, qaza tapqandardyń 20,5%-ǵa tómendeýi baıqalady.

Eń kóp JKO Almaty qalasy, Almaty jáne Ońtústik Qazaqstan oblystarynda oryn alǵan.

Adam ólimi boıynsha Almaty oblysy aldyda tur, onda 162 adam jol apatynda qaza tapqan. Birinshi jartyldyq boıynsha eń úlken jol-kólik oqıǵasy Aqtóbe oblysynda boldy, onda 16 adam zardap shekti, onyń 9-y qaza tapty.

«Apattylyq kartasy» kórsetkendeı, Qazaqstanda Almaty qalasyndaǵy Jandosov pen Manas kósheleriniń qıylysy jol apaty eń kóp oryn alatyn jer bolyp tabylady, onda 9 JKO oryn alyp, 10 adam zardap shekken.