Baspanasyn qorǵaımyn dep ózin-ózi órtep jibergen Almaty qalasynyń  turǵyny Svetlana Turǵanbaevaǵa qatysty zańsyz sheshim shyǵarǵan eks-sýdá Ómirzaq Serimovtyń ózi de sottalýy múmkin, dep habarlaıdy Qamshy.kz aqparat agenttigi 31 arnaǵa silteme jasap.

25 jyl boıy adam taǵdyryn sheship kelgen sýdıanyń budan basqa da zańsyz isterge qatysy bar sekildi.

Svetlana Turǵanbaeva 5 jyl buryn úıinen kúshtep shyǵarmaq bolǵan sot oryndaýshylary men bala-shaǵasynyń kózinshe óz-ózin órtep jibergen. Denesiniń 80 paıyzyn kúıik shalyp, kóp uzamaı aýrýhanada kóz jumdy.

Onyń mundaı qadamǵa barýyna mańdaı terimen tapqan úıin sýdıa Ómirzaq Serimovtyń zańsyz dep tanyp, sot oryndaýshysy Almasbek Eltoqovtyń qysym kórsetýi túrtki bolǵan deıdi marqumnyń balalary.

«Anamdy osyndaı jaǵdaıǵa alyp kelgen Eltoqov. Ol kisi psıhologılyq qysym kórsetip, anamnyń túbine jetti. Oǵan sýdıanyń sheshimi de sebep. Anam balalary dalada qalmasyn dep ózine qol jumsady», – deıdi marqumnyń qyzy.

Áıeli kóz jumǵan soń araǵa 4 jyl salyp jubaıy Zeıish Qorjynbaı da o dúnıelik boldy.

Qazir daýly úıde jetim qalǵan balalary, kúıeý balalary men kelinderi, barlyǵy  16 adam turyp jatyr. Al, úıdiń zańdy ıesi ál belgisiz.

Marqumnyń bes balasy áli kúnge deıin tirkeýge turmaǵan.

Ómirzaq Serimov kásibine jaramsyz, qyzmetine laıyqty emes degen sebeppen otstavkaǵa jiberilgen. Al, onyń zańsyz áreketteri endi ǵana sotqa jetip otyr. Sottyń alǵashqy tyńdalymyna eks-sýdá da, onyń advokaty da kelgen joq. Sondyqtan sot keıinge qaldyryldy.

Sot otyrysyna sýdıa Serimov zańsyz úkim shyǵarǵan degen aıyppen taǵy on shaqty adam keldi.

«Serimov meniń isime qatysty da zańsyz sheshim shyǵarǵan. Endi mine kóp jyldan beri alaıaqtardan óz baspanamdy áreń qorǵap otyrmyn. Sot oryndaýshylary baspanamdy tartyp almaq. Elimizde sottyń sheshimin buzý óte qıyn», – deıdi jábirlenýshi Ilshat Kenzın.