Ataqty Stıven Hokıngtiń tarazdyq izbasary 14 jastaǵy Isaak Mýstopýlo múmkindigi shekteýli balalarǵa kómek kórsetetin «Indıgo» jobasyn iske asyrýdy josparlap otyr, - dep habarlaıdy Qamshy.kz aqparat agenttigi QazAqparatqa silteme jasaı otyryp.

Ol bul týraly EKSPO kórmesindegi Shveısarıa pavılonynda ótken «Adamzat kitaphanasy» atty
is-shara barysynda aıtty. «Arnaıy synyptar ashý - bul bizdiń stılimiz emes. Eger biz oqshaýlana beretin bolsaq, onda  jaǵdaıdy  odan ári qıyndatatyn bolamyz. Eger bizdiń qoǵam múgedek adamdar týraly pikirin ózgertetin bolsa, bizde damyǵan basqa elderden kem emes júıe qalyptasady. Eń jaqyn dosym meni ózimen teń dárejede kóredi. Basqalar da sondaı bolǵanyn qalaımyn. Meni Nazarbaev ýnıversıtetinen basqa birde-bir JOO oqýǵa qabyldamaıtyndyǵyn jaqsy bilemin. Sondyqtan da men «Indıgo» atty mańyzdy jobany jasap jatyrmyn. Qazir pedagogıka mamandary arasynda irikteý júrgizilýde keıin olar tútor bolyp jumys jasaıdy», - dedi Isaak Mýstopýlo.

Aıta ketetin bolsaq, tútor aǵylshyn tilinen aýdarǵanda erekshe pedagogıkalyq laýazym degen maǵynany bildiredi.

«Tútor - ol pedagogıkalyq bilimi bar ózin-ózi oqytqan adamdar.  Bizde semınarlar, trenıńter bolady. Tútor úıge kelip kómek kórsetpeıdi, ol balaǵa túsiniksiz bolǵan kezde ǵana kómekke shaqyrylady. Sóıtip ol balalardyń ózin damytyp, qoǵamǵa beıimdelýine atsalysady. Men osy jobanyń júzege asyrýyna bar kúshimdi salamyn», - dep atap ótti ol.

Sondaı-aq daryndy tarazdyq Kembrıdj ýnıversıtetiniń profesory, aǵylshynnyń ataqty ǵalymy Stıven Hokıngpen  kúzde kezdesetindigi jaıly aıtty. Eske sala keteıik, sal aýrýyna shaldyqqan Isaak Taraz qalasyndaǵy №13 mektepte oqıdy. Biraq, syrqatyna qaramastan ol 2015 jyly oqýshylar arasyndaǵy ulttyq ınovasıalar konkýrsynyń arnaıy syılyǵyna ıe boldy. Sodan beri Isaakty Qazaqstannyń túkpir-túkpiri, tipti, sheneýnikter de tanyp, bile bastady. Sol kezde Investısıalar jáne damý mınıstrligin basqarǵan Áset Isekeshev te Isaakpen tanysyp, onymen túsken sýretin búkil áleýmettik jelige taratqan bolatyn.