SHQO-da daýyl kezinde ústine shatyr qulap ketken 82 jastaǵy Sherıazdan Isanov qaıtys boldy, - dep habarlaıdy Qamshy.kz aqparat agenttigi Tengrinews.kz saıtyna silteme jasap. Ol aýyr jaraqat alyp, jansaqtaý bóliminde jatqan edi. 

Sherıazdan Isanovtyń ólimi jaıly týystary estirtti.

"Ata dúnıeden ótti, keshe júregi shydamady", - dedi qarıanyń nemeresi Ázız.

Qalalyq aýrýhananyń ókilderi naýqastyń ólimin rastady. Dárigerlerdiń aıtýynsha, aýyr jaǵdaıda jatqan tyl ardageri keshki 22.00-de qaıtys bolǵan. Onyń synǵan jeri kóp bolǵan jáne keýdesi tilingen. Marqumnyń týystary bul oqıǵada kimniń kináli ekenin anyqtaýǵa nıetti.

Sonymen qatar, SHQO TJD ókilderi turǵyndardyń daýyl týraly eskertý bolmady dep aıyptaǵanyna baılanysty pikir bildirdi. 

"Aldyn ala, jeksenbide, tústen keıingi ýaqytta "Qazgıdromet" málimetiniń negizinde qutqarýshylar uıaly qosymsha men vedomstvonyń resmı saıty arqyly 17 shildedegi aýa raıy jaıly halyqqa eskertý jasaldy, eskertýde jeldiń sekýndyna 20 metr jyldamdyqpen soǵýy múmkin ekeni aıtyldy. Bul málimet aýa raıyna sáıkes boldy ma, joq pa - bul máseleni TJD-ǵa emes, sınoptıkterge qoıý kerek", - dedi TJD ókilderi.

Eske salaıyq, keshe Shyǵys Qazaqstan oblysynda daýyl turǵan edi. Óskemende julynyp ketken shatyr kólikterdiń ústine túsken, jelden jarnama qurastyrmalary qırap, aıaldamalar men aǵashtardy qulatqan. Daýyl 10-15 mınýttaı ýaqyt bolǵan. Áleýmettik jelilerdegi habarlamalarǵa qaraǵanda, óńirdiń barlyq jerinde de turǵyndar jeldiń bolǵanyn aıtyp otyr. Qoldanýshylar qulaǵan aǵashtar, qıraǵan aıaldamalar jáne búlingen kólikterdi sýretke jáne vıdeoǵa túsirip, redaksıaǵa joldady. Keıin daýyldan bes adamnyń zardap shekkeni belgili boldy.