Ál-Farabı atyndaǵy QazUÝ-da Stýdentterdiń qurylys jasaǵy jyldaǵydaı 1 maýsym kúni jazǵy eńbektiń shymyldyǵyn ashqan bolatyn. Sodan bergi bir jarym aıdan astam ýaqytta stýdent-jumysshylar ónimdi eńbekpen, jaqsy nátıjemen kózge túse bildi. QazUÝ qalashyǵy tazalyq jáne qurylys jumystaryna aıtarlyqtaı aralasqan stýdentter jumystan tys ýaqyttaryn da bos ótkizgen joq.

Shtab basshysy Kólbaev Nurbolat Shaǵymanuly stýdentterdiń bos ýaqyttaryn tıimdi ótkizip, sporttyq, qoǵamdyq sharalarǵa belsene qatystyrýdy qolǵa alǵan bolatyn. Sol maqsatqa saı , aldyn ala jasalǵan josparǵa sáıkes, 5 maýsym kúni fýtbol oıyndarynan saıys ótkizilse, 14 maýsym kúni uldar men qyzdardyń qurama komandalary arasynda voleıbol oıynynan jarys ótkizildi.

Fýtboldan ótkizilgen saıysqa «Shalǵyshylar», «Sýǵarý», «EPS», «Qurylysshylar brıgadasy» syndy komandalar men quramynda Nurbolat Shaǵymanuly men orynbasary Qudaıqul Baqdáýlet bolǵan basshylyqtyń «Chelsı» quramasy qatysty. QazUÝ qalashyǵy stadıonynda ótkizilgen saıysty tamashalaýǵa kórermender de kóptep jınaldy. Saıys qorytyndysy boıynsha, Anglıa Premer-lıgasynyń jeńimpaz klýbymen attas bolǵan «Chelsı» komandasy basym eseppen birinshi orynǵa ıe boldy.  2-oryndy «Sýǵarýshylar» brıgadasy ıelense, «Shalǵyshylar» komandasy úshinshi orynnan kórindi. Kóptegen qyzyqtarǵa toly bolǵan tartysty oıynnyń sońynda jeńimpaz komandalar arnaıy kýbokpen marapattaldy. Sonymen qatar, jeke oıynshylarǵa da arnaıy marapattar taǵaıyndalyp, Álimbekov Eldos «Eń úzdik qaqpashy», Sársenbaı Aıtbek «Eń úzdik shabýylshy», Dúısenov Temirlan «Eń úzdik qorǵaýshy» ataǵyna ıe boldy.

Araǵa apta salyp ótkizilgen voleıbol saıysy da birshama tartysty ótti. Joǵarǵy deńgeıdegi saıystarǵa qatysyp júrgen voleıbolshylar, kapıtandar óz komandalaryn alǵa súıredi. Qyzý oıyn kórsetip, bir-birine des bermegen komandalardyń ishinen kil myqtylar ozyp shyǵyp,  marapattarǵa ıe boldy. Qorytyndy esep boıynsha, fınaldyq oıynda júldege talasqan «EPS» quramasy birinshi orynǵa ıe boldy. Komanda kapıtany, «Qyzylaraı» voleıbol komandasynyń oıynshysy Mahmet Kenje úzdik oıynshy retinde atalyp ótti. Ekinshi orynǵa ózderiniń kóńildi ataýymen  erekshelengen «Kıtkat» komandasy ıe boldy. Jumys ýaqytynda da birge jumys istep, dostasyp úlgergen «SQJ UNITED» komandasynyń músheleri úshinshi oryndy ıelendi. Bul komandalar da ózderiniń attary jazylǵan arnaıy kýboktarmen marapattaldy.

Saıys nátıjesi Nurbolat Shaǵymanulynyń uıymdastyrýymen Jastar alańynda ótkizilgen arnaıy keshte qorytyndylanyp, júldegerlerge marapattary resmı túrde tapsyryldy. Kesh jastar bıimen jalǵasty.

Aıta keterlik jaıt, Almaty qalasy «Jasyl el» basqarmasy QazUÝ jastarynyń bastamasyn qoldap, ýnıversıtetaralyq saıystar ótkizýge usynys tastady. Ózge oqý oryndaryndaǵy qurylys jasaǵynyń stýdentterimen bolatyn saıysta óz quramamyzǵa sáttilik ári jalyndy jeńis tileımiz!

Ánel Altaeva