«Qazaqtelekom» AQ, fıskaldyq derekter operatory retinde, «Chek talap et – júlde ut» aksıasyn bastady dep habarlaıdy Qamshy.kz aqparat agenttigi. Júldelerdi utysyn oınatý kúndelikti saǵat 16:00, ESKPO halyqalaralyq kórme aýmaǵynda «Qazaqtelekom» AQ kórnekilik qabyrǵasy aldynda ótedi.
Qazaqstan Respýblıkasy Úkimetiniń 2014 jylǵy qaýlysy boıynsha, «Qazaqtelekom» aksıonerlik qoǵamy ortaq paıdalanýdaǵy telekomýnıkasıalar jelileri boıynsha salyq qyzmeti organdaryna aqshalaı esep aıyrysýlar týraly málimetterdi jedel rejımde berýdi qamtamasyz etetin zańdy tulǵa bolyp tabylatynyn eske salamyz.
Aksıaǵa qatysýǵa EKSPO aýmaǵynda ornalasqan jáne www.oofd.kz portalynda tirkelgen baqylaý-kassa mashınalarymen berilgen chekter qabyldanady. FDO júıesine tıesiligin tekserý úshin chektiń tómengi bóligindegi qujattyń fıskaldyq aqparatyn qaraý kerek. FDO belgisi joq chekter júldeler utys oıynyna qatysa almaıdy.
«Qazaqtelekom» AQ Korporatıvtik satý dıreksıasynyń Inovasıalyq qyzmetter qyzmetiniń bastyǵy Anýar Otarbaev: «Chek talap et – júlde ut» aksıasy josyqsyz salyq tóleýshilerdi anyqtaýǵa, sonymen qatar, azamattyq belsendilikti jáne salyq saýattylyǵyn damytý maqsatynda baǵyttalǵan. Bul aksıanyń birinshi kezeńi. Jyldyń aıaǵyna deıin búkil el kóleminde ótetin aksıanyń ekinshi kezeńin ótkizý josparlanýda» - dep túsindirip ótti.
Utys oıyny táýlik ishinde berilgen chekterdiń arasynan kezdeısoq tańdaý jasaý ádisimen jeńimpazdy tańdaý arqyly júrgiziledi. Bul rette, kez kelgen somaǵa berilgen chek jeńis jetkizip, flash drive, powerbank jáne basqa baǵaly syılyqtardy utyp alý múmkindigin beredi. EXPO — 2017 Astana kórmesi aıasyndaǵy júldeler utysyn oınatý kúndelikti saǵat 16:00-de ótedi.
