Samoa turaqty damýynyń jahandyq maqsaty: jańartylatyn energıa kózderine qoljetimdilikti qamtamasyz etý dep habarlaıdy Qamshy.kz aqparat agenttigi.
Jıynnyń resmı bóliginde Samoa Qarjy mınıstriniń orynbasary Mýlıpola Leıataýa Lakı Mýlıpola energetıkanyń kez-kelgen memlekettiń ekonomıkalyq baǵytynda asa mańyzdy qural ekendigin tilge tıek etti. Onyń aıtýynsha, energıa barlyq salalarmen ǵana emes, araldar, elder men ulttardy da baılanystyratyn qajetti resýrs.
«Bolashaq energıasy» taqyrybynyń mańyzdylyǵyn eskere otyryp, Samoa Úkimeti EKSPO-2017 kórmesine qoldaý kórsetedi. Adamzattyń energıany shamadan tys paıdalanýy syndy jahandyq máselelerdi sheshýde EKSPO-nyń mańyzy zor. Samoanyń Klımattyń ózgerýi jónindegi BUU negizdemelik Konvensıasy jáne 2025 jylǵa deıin elektroenergıa óndirisi úshin jańartylatyn energıa kózderiniń 100% qoldanylýyn engizý arqyly parnıktik gaz qaldyqtaryn qysqartý jónindegi Klımattyq mindettemeleriniń aınymastyǵyn rastaımyz. Turaqty energıamen qamtamasyz etý salasyndaǵy Energetıka sektorynyń maqsaty aıasynda «Ómir súrý deńgeıin jaqsartý» atty jańa memlekettik saıasat kómegimen Samoa osy maqsatty júzege asyrýda. Qazaqstan Respýblıkasy Úkimetine osy bedeldi is-sharaǵa qatysý múmkindigi úshin alǵysymyzdy bildiremiz», - dedi Samoa Qarjy mınıstriniń orynbasary.
Óz kezeginde QR Eńbek jáne halyqty áleýmettik qorǵaý mınıstrliginiń jaýapty hatshysy Aıda Qurmanǵalıeva Qazaqstan men Samoa Táýelsiz Memleketi jasyl ekonomıka baǵytynda ózara tıimdi yntymaqtastyqty qalyptastyryp, damytý úshin zor múmkindik bar ekendigin atap ótti. Buǵan 2013 jylǵy 7 aqpanda, Nú-Iork qalasynda eki el arasynda qol qoıylǵan Birlesken komúnıke dálel.
«Qazaqstan Samoa Táýelsiz Memleketiniń túrli salalardaǵy tájirıbesin zertteýge múddeli. Eki eldiń áleýmettik ıgiligi úshin seriktestikke daıynbyz. Samoa ekspozısıasynda energetıka salasyndaǵy sońǵy jobalar men eldiń salt-dástúri, mádenıeti kórsetiledi. EKSPO-2017 Halyqaralyq mamandandyrylǵan kórmesine qatysqandaryńyz úshin alǵys bildiremiz», - dedi Aıda Qurmanǵalıeva.
Samoa Táýelsiz Memleketi - Tynyq muhıttyń ońtústik tarabyndaǵy Samoa arhıpelaginiń batys araldarynda ornalasqan memleket. Memlekettiń ekspozısıasy Tyńyq muhıt plazasynda ornalasqan jáne eldiń balamaly energıa kózderin engizý týraly ustanymyn kórsetedi. Kórmege kelýshiler Samoa Táýelsiz Memleketiniń qalyptasý tarıhy, mádenıeti, salt-dástúri men zamanaýı saıası qurylymymen tanysýǵa múmkindik alady.
