QR Din isteri jáne azamattyq qoǵam mınıstrliginde vıse-mınıstr Berik Arynnyń tóraǵalyǵymen «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» Zań jobasyn talqylaý jónindegi otyrys ótti dep habarlaıdy Qamshy.kz aqparat agenttigi.
Atalǵan otyrysqa Qazaqstan Musylmandary dinı basqarmasynyń basshylyq quramy, ımamdar, «ÝAQYP» qaıyrymdylyq qorynyń jáne Din máseleleri jónindegi ǵylymı-zertteý jáne taldaý ortalyǵynyń ókilderi men dintanýshy ǵalymdar qatysty.
Kezdesý barysynda otyrystyń ashylýynda sóz alǵan vıse-mınıstr Berik Aryn dinı qyzmet jáne dinı birlestikter týraly zańnamada azamattardyń quqyqtaryna kepildik beretin jáne qorǵaıtyn, ekinshi jaǵynan dindi ekstremıstik jáne basqa da destrýktıvti maqsatta qoldaný múmkindigin tómendetýge baǵyttalǵan quqyqtyq normalardy qalyptastyrý qajettigin basa aıtty.
Al, dintaný saraptamasy basqarmasynyń basshysy Myrzaev Balǵabek zań jobasyna engiziletin jańashyldyqtarǵa toqtaldy. Onyń sózinshe, zań jobasynda shetelde dinı bilim alý, qoǵamdyq oryndarda adamnyń bet beınesin tumshalaıtyn kıim túrlerin kıýdi shekteý, din qyzmetine memlekettik qyzmetkerlerdiń qatysýy, dinı joralǵylar boıynsha nekeni qıǵyzýǵa qatysty jańa normalar qabyldanatyn bolady.
Budan bólek, zań jobasy aıasynda BAQ-ta jarnamalanatyn jáne taratylatyn destrýktıvtik ıdeologıalyq aǵymdardyń kıim túrlerin kıýge shekteý qoıý kózdelgen. Bul óz kezeginde kámelettik jasyna tolmaǵan jasóspirimderdiń zańsyz dinı aǵymdarǵa tartýǵa qatysty jaýapkershilikti kúsheıtedi.
Otyrys barysynda qatysýshylar din máseleleri boıynsha zańnamalyq aktilerge engiziletin túzetýlerdiń mańyzdylyǵyna toqtaldy. Olardyń aıtýynsha, zań jobasy dinı ekstremızm ıdeologıalarynyń tarap ketýiniń aldyn-alý boıynsha jalpy memlekettik júıeni qalyptasyrý jáne memlekettiń zaıyrly qaǵıdattaryn kúsheıtýge negiz bola alady.
Esterińizge sala keteıik, atalǵan zań jobasynyń tolyq nusqasy QR Din isteri jáne azamattyq qoǵam mınıstrliginiń resmı saıtynda jáne «Elektrondy Úkimet» portalynda jarıalanǵan.
