Elbasy «Samuryq-Qazyna» aksıonerlik qoǵamy basqarmasynyń tóraǵasy Ómirzaq Shókeevti qabyldady. Bul týraly Qamshy.kz aqparat agenttigi Aqordanyń baspasóz qyzmetine silteme jasap habarlaıdy.

Qazaqstan Prezıdenti elimizdiń ekonomıkasynda qordyń mańyzdy ról atqaratynyn atap ótip, ony ári qaraı damytýdyń jekelegen baǵyttaryna toqtaldy.

– «Samuryq-Qazyna» qorynyń el ekonomıkasy úshin mańyzy zor. Ol memlekettiń negizgi aktıvterin basqaryp otyr. Qazirgi ýaqytta ahýaly jaqsy. Metaldar baǵasynyń konúnktýrasy qolaıly bolyp qalýda, – dedi Nursultan Nazarbaev.

Ó.Shókeev Memleket basshysyna bıylǵy 7 aıda atqarylǵan jumystardyń qorytyndysy, sondaı-aq qordy jáne onyń enshiles kásiporyndaryn transformasıalaý barysy týraly baıandady.

– Qordyń óndiristik jáne baǵa kórsetkishteri byltyrmen salystyrǵanda áldeqaıda joǵary. Jalpy, qordyń jaǵdaıy turaqty. Qazir enshiles kompanıalarda transformasıalaýdyń 130-ǵa jýyq jobasy engizilýde. Jekeshelendirýge qatysty aıtar bolsaq, josparlanǵan 2015 nysannyń 60%-y jekeshelendirildi. Búginde iri kompanıalardy satýǵa kiristik, – dedi «Samuryq-Qazyna» aksıonerlik qoǵamy basqarmasynyń tóraǵasy.

Sondaı-aq, Ó.Shókeev Halyqaralyq IFSWF-2017 táýelsiz ál-aýqat qorlary forýmyn ótkizýge daıyndyq barysy jóninde aıtty. Onda álemdik ekonomıka jaǵdaıyndaǵy ınvestısıalyq saıasat máselelerin talqylaý josparlanýda.

Sońynda Elbasy birqatar naqty tapsyrma berdi.