Tanymal prodúser, telejúrgizýshi Láılá Sultanqyzy óziniń áleýmettik jelidegi paraqshasynda baǵdarlamanyń jabylýyn túsindirip, 4 jyl boıy ózderimen birge bolǵan kórermenderge alǵys aıtty.
Bul týraly Qamshy.kz aqparat agenttigi Láılá Sultanqyzynyń Feısbýktegi paraqshasyna silteme jasap habarlaıdy.
"Qymbatty kórermen! 2013 jyldan beri kórermender kózaıymyna aınalǵan «Áıel Baqyty» baǵdarlamasy arna basshylyǵy men bizdiń taraptyń ortaq sheshimi aıasynda qyrkúıek aıynyń 1 juldyzynan bastap efırge shyǵýyn toqtatady. Osy oraıda, Ulttyq arna basshylyǵyna, bizben birge bolǵan kórermenniń árqaısysyna jeke alǵysymyzdy bildiremiz.
Tórt jyldyń ishinde el arasynda tanymaldylyq pen joǵary reıtıńke ıe bolǵan «Áıel Baqytynda» 1000-ǵa jýyq efır kórermender júregine jol tartyp, 3000-ǵa jýyq keıipker qatysty. Siz ben biz bolyp tikeleı efırde túrli ózekti taqyryptardy qozǵadyq. Bul joba arqyly áıel qaýymyna Láılá Sultanqyzy men “Áıel Baqyty” jobasynyń ujymy kishkene bolsyn baqyttyń bólshegin syılady dep esepteımiz.
Sebebi sońǵy jyldyń ózinde jobanyń arqasynda 40-qa jýyq áıel jumyspen qamtyldy. 100-ge jýyq keıipkerge qarjylaı kómek kórsetilip, keıbireýine áli kúnge deıin kómek berilip keldi. 20 ana balasyna sapaly ári zamanaýı medısınalyq kómek aldy. Joba aıasynda 10 balaǵa mektep formasy men demalys lagerine joldama berildi. 3 keıipkerimiz tolyǵymen alkogolızmnen aıyqty. 2 áıel jasandy jolmen ana baqytyn sezindi. 50 áıel áleýmettik kómek alyp, óz kásibin ashty. 70 áıel otbasyn saqtap qaldy. «Jar-Jar» aıdary boıynsha 4 jup qosyldy. Bul baǵdarlama arqyly anasy men qyzy 27 jyldan keıin qaýyshty. «Úlgili otbasy» aıdaryna elimizdegi eń berekeli 150 otbasy shaqyrylyp, baqytty bolýdyń syrymen bólisti. Kez kelgen áıeldiń taǵdyryna beı-jaı qaramaǵan «Áıel Baqyty» baǵdarlamasymen birge bolǵandaryńyzǵa taǵy da raqmet! Jańa jobalarda júzdeskenshe!
Árbir teleónimniń ózindik ómirlik sıkly bar. Baǵdarlamamyzdyń arqasynda jańashyl televızıonshıkterdiń bir býyny pisip-jetilip shyqty. Olar da uıadan ushqan qustaı otandyq televızıadaǵy basqa habarlarda ornyn tappaq. Bul jaǵdaı, árıne, biz úshin adal bop kelgen kórermenniń kóńiline qaıaý túsirse, saralap qarasaq, ár tarap úshin paıdasy bar jaǵdaı bolady. Telearna jańa ónimdermen tolyǵady, bizdiń kompanıa jańa belesterge umtylady, al júreginde oty bar ár mamanymyz úshin bul karerasyn básekeli naryqta órge domalatýǵa taǵy bir múmkindik. Baǵdarlama bolyp bastalǵan “Áıel Baqyty” búginde brendke aınaldy desek te, artyq aıtqanymyz emes. Baǵdarlama ekrannan ketse de, brendimiz áleýmettik jelilerden, ıýtýb arnalarynan, halyq nazarynan ketpeıdi.
Jýyrda bizdiń kompanıanyń mediaprom.kz saıty tolyqqandy jumysyn bastaıdy. Kompanıamyz ben shyǵarmashylyq toptyń ózge de jobalary, jańalyqtary týraly sol jaqtan habardar etip turamyz", – dep atap ótti prodúser.
Aıta keteıik, budan buryn "Qazaqstan" ulttyq arnasyndaǵy "Aıtýǵa ońaı" tok-shoýynyń da jabylǵanyn onyń júrgizýshisi bolǵan Beısen Quranbek habarlaǵan edi.
