23 tamyzda «80 Day Race» jarysynyń ortaq negizin salýshy Frank Manders jáne «Astana Konvenshn Búro» JSHS dırektory Sanıar Áıtekenov «80 Day Race» dúnıejúzilik jarysynyń shabandozdary aıaldaıtyn toǵyz qalanyń biri retinde Astananyń dodaǵa qatysatyny jóninde memorandýmǵa qol qoıdy dep habarlaıdy Qamshy.kz aqparat agenttigi.
Bul jóninde Nıderland Koróldiginiń pavılonynda ótken baspasóz májilisi kezinde belgili boldy. Qazaqstandyq jýrnalıser is-shara aıasynda atalǵan jarystyń qurmetti ókili ataqty Bertran Pıkkarmen, «80 Day Race» jarysynyń ortaq negizin salýshy Frank Manderspen jáne de Astanaǵa óziniń «Nissan Leaf» elektromobılimen kelgen jarystyń qatysýshysy Krıs Ramsımen kezdesken bolatyn.
«Qazaqstan – jańa bolashaqty jasap, qarqyndy damyp kele jatqan ınovasıalyq, bıik maqsattardy kózdegen el. Al Astana – el damýyndaǵy nátıjeleredi aıshyqtaıtyn qala. Qazaqstannyń jańa dúnıelerge degen ashyqtyǵy jáne de bolashaq tehnologıalarǵa ınvestısıa quıýǵa degen nıeti EKSPO-2017 «Bolashaq energıasy» jobasy arqyly júzege asyp otyr. «80 Day Race» jarysy da bolashaq tehnologıalardy keńinen taratýdy kózdeıdi. Joba jańa, taza, jarqyn keleshekke óz úlesimizdi qossaq, turaqty tehnologıalardyń damýyna jaǵdaı jasasaq degen nıetimizden týyndady. Astana «80 Day Race» jarysyn qabyldaýǵa keliskenine biz asa qýanyshtymyz», - dedi «80 Day Race» jarysynyń ortaq negizin salýshy Frank Manders.
«80 DAY RACE» dúnıejúzilik jarysy – 2019 jyly ótetin aýqymy jaǵynan teńdesi joq doda. Onyń aıasynda 40-qa tarta komanda 40 000 shaqyrymǵa sozylǵan joldy júrip ótip, 80 kún ishinde Parıjge oralýǵa tyrysatyn bolady, olar kúnine 500 shaqyrymnan asa joldy eńseretin bolady. Shabandozdar tek jańartylmaly qorlardy tutynatyn jáne de ishten janatyn qozǵaltqyshsyz jumys jasaıtyn kólikpen ǵana jarysatyn bolady.
Baspasóz májilisine kelgen spıkerler atap ótkendeı, «80 Day Race» syndy aýqymdy dodany ótkizý ıdeıasy Nıderlandta týyndapty. İs-sharanyń basty maqsaty - ekologıalyq taza kólik týraly jáne de jasyl tehnologıalardy keńinen qoldanýǵa bolatyndyǵy jaıly búkil álem jurtshylyǵyn habardar etý.
«Bizdiń álem halyqtyń ómir sapasyn jaqsartýdyń jańa joldaryn tabýy tıis. Qorshaǵan ortamyzdy lastap otyrǵan eski qurylǵylardy zamanaýı ári taza tehnologıalarǵa aýystyraıyq. Energıany únemdep, qorshaǵan ortany qorǵaýǵa
múmkindik beretin ónimder arqasynda ǵana turaqty ósýge bolady. Al búgingi kúni ekologıa men ekonomıkany biriktirý múmkin bolyp otyr», - dep atap ótti baspasóz májilisi kezinde «80 Day Race» jarysynyń qurmetti ókili B. Pıkkar.
Jarysty uıymdastyrýymen aınalysyp otyrǵan komanda osyndaı dodalardy ótkizý jaǵynan kóp jyldyq tájirıbesi bar, atap aıtqanda, dúnıejúzine tanymal «Paris Dakar» jáne «Volvo ocean race» syndy jarystardy uıymdastyrǵan. Shabandozdar Parıjdegi Eıfel munarasynan bastap jolǵa shyǵyp, júretin jol baǵytyn jáne ekologıalyq kóligin ózderi tańdaı otyryp, 8 iri qala arqyly jer sharyn aınalyp saıahat jasamaq.
2017 jyldan bastap komandalardyń daıyndyǵyn baqylap otyrǵan «National Geographic» telearnasy búkil álem boıynsha 4 serıalyq derekti fılmdi kórsetetin bolady. Uıymdastyrýshylar «80 Day Race» jarysyn árbir 3 jyl saıyn ótkizýdi josparlap otyr.
