Bangladeshtiń jańartylatyn energıa kózderiniń qýaty 423 MVt quraıdy dep habarlaıdy Qamshy.kz aqparat agenttigi.
Bul týraly EKSPO-2017 Halyqaralyq mamandandyrylǵan Kórmesi aıasynda eldiń Ulttyq kúnin merekeleý barysynda Bangladesh Halyq Respýblıkasynyń Qazaqstan Respýblıkasyndaǵy Tótenshe jáne ókiletti Elshisi Mosýd Mannana málimdedi. Óz sózinde Mosýd Mannana Bangladesh taza jasyl energıa men jańartylatyn energıa kózderimen baılanysty mindettemelerin oryndaıtynyn atap ótti. Onyń aıtýynsha, qazirgi kezde qýaty 282 MVt quraıtyn jasyl energıany óndire alatyn jobalar júzege asyrylýda.
«Bangladesh jeke jáne jeliden tys aımaqtarda kún energıasyn tutynatyn úıler júıelerin qurý arqyly úlken jetistikterge jetti. Búginde 4.4 mıllıon kún energıasyn tutynatyn úıler júıeleri ornatyldy. Dúnıejúzilik bank baıandamasy, jańartylatyn energıa kózderine sholý jáne jumys oryndaryna qatysty bir jyldyq sholýǵa sáıkes, Bangladeshtiń kún energıasy júıesi álemdegi tabysty jobalardyń biri bolyp tabylady. Sondaı-aq, memleketimiz jel energıasy, kelginsýlar energıasy, tolqyn energıasy, bıogaz jáne basqa da jańartylatyn energıa kózderin qoldaný múmkindigin zertteýde. Kórmeniń «Bolashaq energıasy» taqyryby energetıkalyq balansty qaıta qalpyna keltirý máselesin talqylaýǵa múmkindik berdi», - dep málimdedi Mosýd Mannana.
Óz kezeginde Qazaqstan Respýblıkasy Ádilet mınıstriniń orynbasary Janat Eshmaǵambetov Astana qalasyndaǵy EKSPO-2017 Kórmesinde bolashaq energıasynyń damýy úshin úlken úles qosatyn álemdegi ozyq ǵylymı jáne tehnologıalyq jetistikter jınalǵandyǵyn atap ótti. Onyń aıtýynsha, Kórme jasyl energetıka progresiniń nyshany jáne adamzattyń jańartylatyn energıa kózderine kóshý talpynysynyń kórinisi bolyp tabylady.
«Halyqaralyq Kórme ındýstrıalandyrýdyń nyshany, sondaı-aq, tehnıkalyq jáne tehnologıalyq jetistikterdi tanystyrý úshin tamasha múmkindik bolyp tabylady. «Bolashaq energıasy» taqyrybyndaǵy EKSPO-2017 kórmesi balamaly energıa kózderi, álem boıynsha taza energıany taratý sıaqty halyqaralyq qaýymdastyqtyń ózekti máseleleriniń birine arnalǵan», – dep atap ótti Janat Eshmaǵambetov.
EKSPO-2017 kórmesine 115 memleket jáne 22 halyqaralyq uıymdar qatysýda. Sondaı-aq iri korporasıalar balamaly energıa kózderi salasyndaǵy jetistikteri men ázirlemelerin usynýda.
