Almaty oblysy Úshtóbe qalasynda áleýmettik jaǵdaıy tómen otbasylar úshin "Sabına" atty et satatyn áleýmettik dúken ashyldy. 

Saltanatty rásimdi aýdan ımamy Ábýdardan Talasbaı men Úshtóbe qalasy ákimdiginiń bas mamany Gúlnar Kıikbaeva atqaryp, aq jaýlyqty analar táttiden shashý shashty.

Taýyq jáne iri qara maldyń eti satylatyn dúkenniń ashylý saltanatyna úshtóbelikter bir kisideı atsalysty. Aldaǵy ýaqytta dúkende halal shujyq, tushpara, jartylaı fabrıkat ónimderin qamtamasyz etý maqsatynda shaǵyn seh ashylmaq.

"Sabına" sharýa qojalyǵynyń basshysy Qaırat Mamyraevtyń aıtýynsha, bul dúkendegi et baǵasy ózge saýda oryndarymen salystyrǵan arzan ári sapaly.

"Dúken sórelerine qoıylǵan iri qaradan bastap, taýyq etine deıin ózimizdiń taza ónim. Sebebi, maldyń bárin ózimiz bordaqylaımyz. Bul jumysty byltyr qystan bastap qolǵa aldyq. Sharýashylyqta 80 bas iri qara mal bar. Qazirgi tańda qoı malyn da bordaqylý ústindemiz. Eń bastysy halyq rıza. Qyrkúıek aıynyń sońyna deıin dál osyndaı taǵy da bir áleýmettik dúken ashýdy josparlap otyrmyz", - deıdi sharýashylyq basshysy.

Arzan ári sapaly ónim alýshylar qatary kún saıyn kóbeımese azaımasy anyq. Jerlesterine barynsha jaqsy jaǵdaı jasap jatqan kásipker eńbegine tabys tileımiz.