5 qyrkúıekte Nıderland Koróldiginiń Ekspo-2017 kórmesine qatysýy aıasynda golandıalyq jylyjaı sektorynyń tizbegine arnalǵan semınar ótti dep habarlaıdy Qamshy.kz aqparat agenttigi. Aýylsharýashylyq salasyndaǵy 14-ten asa golandıalyq kompanıa jylyjaı sektoryndaǵy zamanaýı joǵary tehnologıalyq sheshimder jóninde áńgimelep, Qazaqstannyń aýylsharýashylyq salasyndaǵy kásipkerlerimen jáne fermerlermen B2B kezdesýlerin ótkizdi. Astanadaǵy semınardan keıin delegasıa Taldyqorǵanǵa jáne Almatyǵa bet alady. Taldyqorǵanda golandıalyq kásipkerler jergilikti agrarshylarmen kezdesip, al Almatyda golandıalyq tehnologıa negizinde jumys jasaıtyn jylyjaıǵa baryp qaıtady.
Qazirgi tańda sarapshylar Nıderlandtyń jylyjaı óndirisin eń keń suranysqa ıe ári zamanaýı tehnologıa retinde moıyndap otyr. Osynyń arqasynda Nıderland shaǵyn jer aýmaǵy men azdaǵan halyq sanyna qaramastan, aýylsharýashylyq sektoryndaǵy álemdik kóshbasshy retinde ornyn saqtap keledi. Búgingi kúni Nıderland kólemi jaǵynan ekinshi orynda turǵan aýylsharýashylyq ónimderin shyǵaratyn álemdik eksportshy, sondaı-aq, ósimdik sharýashylyǵyndaǵy kóshbasshy el sanalady.
Astanadaǵy semınar maqsaty – Nıderland pen Qazaqstannyń aýylsharýashylyq salasyndaǵy yntymaqtastyǵyn nyǵaıtý. İs-sharanyń ashylý saltanatynda Nıderland Koróldigi elshiliginiń Almatydaǵy keńsesiniń basshysy Vılko Roggenkamp jáne «Agrarlyq nesıe korporasıasy» AQ basqarma tóraǵasy Narmuhan Sarybaev sóz sóıledi. Semınarǵa jylyjaı sektorynda qyzmet jasaıtyn 14 golandıalyq kompanıa jáne de aýylsharýashylyq salasyndaǵy 100-den asa qazaqstandyq fermer men maman qatysty. Semınarǵa qatysqan golandıalyq kompanıalardyń jartysynan kóbi qazirdiń ózinde agrobıznes salasynda Qazaqstanmen yntymaqtastyq júrgizýde jáne de olar salanyń áleýetine joǵary baǵasyn berip otyr.
«Osy saýda mısıasynyń arqasynda golandıalyq kompanıalar Qazaqstannyń aýylsharýashylyq salasynyń áleýetin baǵalaýǵa múmkindik almaq. Óz kezeginde 14 golandıalyq kompanıanyń Ekspo-2017 aıasyndaǵy osy semınarǵa qatysýy golandıalyq saraptama men tehnologıalardyń sapasyn, senimdiligin jáne ınovasıalyq qaýqaryn baıqatady dep úmittenemin», - dep atap ótti Nıderland Ekonomıkalyq ister mınıstrliginiń agrobıznes salasyndaǵy halyqaralyq yntymaqtastyq jónindegi dırektory Mıhıl van Erekel.
Búgingi kúni aýyl sharýashylyǵy – kólemi jaǵynan energetıka salasynan keıin ekinshi oryndaǵy Nıderland pen Qazaqstannyń ózara yntymaqtasyp otyrǵan salasy. Máselen, eki el arasynda saýdalanǵan aýylsharýashylyq jáne baǵbandyq ónim kólemi 2015 jyly 100 mln. eýrodan asty, onyń aıtarlyqtaı bóligi jylyjaı sharýashylyǵyndaǵy jobalardyń úlesine tıesili. Qazirgi tańda Golandıanyń aýylsharýashylyq salasyndaǵy 40-tan astam kompanıasy Qazaqstanmen jemisti yntymaqtastyq júrgizýde.
Máskeýdegi Nıderland Koróldigi elshiliginiń aýyl sharýashylyǵy salasyndaǵy máseleler jónindegi keńesshisi Meýves Braýerdyń aıtýynsha, golandıalyq bıznes Qazaqstandaǵy qyzmetin ary qaraı da keńeıtýge nıetti. «Nıderland Qazaqstandaǵy naryqtyń qajettilikterin qanaǵattandyrý úshin sizderdiń elderińizben kóp jyldardan beri tabysty yntymaqtasyp keledi. Nıderland – joǵary sapaly tuqymdar men kóshetterdi, zamanaýı ınovasıalyq tehnologıalardy jetkizip, aýylsharýashylyq salasyn kásibı konsaltıńpen, trenıńtermen qamtamasyz etip otyrǵan birden-bir el», - dep qosty ol.
Nıderland Koróldigi Elshiliginiń golandıalyq bıznes ókilderine jáne qazaqstandyq fermerlerge arnap ótkizetin kezdesýleri qashanda úlken suranysqa ıe. Bıyl bul is-sharany Ekspo-2017 halyqaralyq kórmesi aıasynda uıymdastyrý týraly sheshim qabyldandy.
Bıyl saýda mısıasyna iri golandıalyq kompanıalar qatysýda, atap aıtqanda, olardyń arasynda AltroNova (tuqymdar), Bom Group (daıyn jylyjaılar kesheni), Celtic Cooling (muzdatqysh jáne jeldetkish jabdyqtar), Certhon (jylyjaı keshenderi men júıeleri), Dalsem (jylyjaı jobalaryn daıyndaý), Enza Zaden Export B.V. (tuqymdar), Hoogendoorn Growth Management (avtomattandyrý júıeleri), Hortilux Schréder (jylyjaılarǵa arnalǵan jaryqtandyrý), Koppert (ósimdikterdi bıologıalyq qorǵaýǵa arnalǵan quraldar), Philips Lighting Kazakhstan and Central Asia (jaryq tehnıkasy jáne jaryqtandyrý), Prime Horti Solutions LLP (jylyjaılar jáne jylyjaılarǵa arnalǵan zattar), Van den Bos Flowerbulbs (gúl badanalary), Van der Hoeven (aýyl sharýashylyǵyna arnalǵan daıyn jobalar) syndy kompanıalar bar.
