Ońtústik Qazaqstan oblysynda «EKSPO-2017» halyqaralyq mamandandyrylǵan kórmesindegi Afrıka elderiniń kórme-jármeńkesi ashyldy, dep habarlaıdy Qamshy.kz aqparat agenttigi OQO ákiminiń baspasóz qyzmetine silteme jasaı otyryp.

Shymkent qalasynyń «Kórme» ortalyǵynda 10 qazanǵa deıin  ótetin shara eki el arasyndaǵy týrızmdi damytý, ınvestısıalyq múmkindikterge jol ashý, iskerlik qatynastardy jaqsartý maqsatynda oblys ákimdiginiń qoldaýymen uıymdastyrylyp otyr.

Kórmeniń ashylý saltanatyna qatysqan Ońtústik Qazaqstan oblysynyń ákimi J.Túımebaev Afrıka eli qonaqtaryna qosh keldińizder deı otyryp, olardyń alyp kelgen ónimderin tamashalady.

«Halyqaralyq kórmede qanshama elder óz mádenıetterin, ulttyq ózindik erekshelikterin tanytyp ózderiniń ekonomıkalyq jáne tehnologıalyq damý deńgeıler men jetistikterin kórsetti. Búgingi kúni Ońtústik óńirine sol kórmeniń bir bóligin alyp kelip otyrǵan Afrıka eline úlken alǵysymdy bildiremin. Búgingi kórmeniń ótý maqsaty, týrızmdi damytý, múmkindikterge jol ashý, bıznestik baılanystardy jetildirý»,-dedi ákim.

Kórmede Afrıka qurlyǵynan kelgen birneshe respýblıka óz ónimderin kópshilik nazaryna usynyp otyr. Olar 20-dan astam kompanıa men Efıopıa, Kenıa,  Tanzanıa, Gvıneıa, Gambıa, Sýdan jáne Iemen elderiniń  qolóner sheberleri.  Afrıkalyqtar jańa tehnologıalarmen qatar, kópshilikke kóterińki kóńil-kúı de syılaı bildi.

Kórmedegi  Afrıka bazarynan  qolóner buıymdaryn satyp alý múmkindikteri bar. Olardyń shaı, kofe jáne qoltyraýyn, pıton terisinen jasalǵan sómkeleri men kıim-keshekteri úlken suranysqa ıe.