Qala kúni qarsańynda Almaty turǵyndary men qonaqtaryn óte mazmundy mádenı-kóńildi baǵdarlamalar kútip tur, olar: dástúrli «ALMAFest-2017» alma festıvali, kópmyńdyq «Open Air «Gakku daýsy», «Almaty Arenadaǵy» «EMA-2017» mýzyka syılyǵy jáne basqalary. 17 qyrkúıekke deıin júrginshige basymdyq beretin Panfılov, Jibek joly, Gogol, Kabanbaı batyr kóshelerin qaıta jasaý jumystary aıaqtalady. Jaqynda ǵana jańarǵan «Astana» alańy, Naýryzbaı aýdanynyń jańa ákimshilik- iskerlik ortalyǵy, «Open Almaty» qalalyq qoǵamdyq qabyldaý nysany ashylǵan bolatyn. Bul jaıynda Qamshy.kz aqparat agenttigi Almaty qalasy ákimdiginiń baspasóz qyzmeti málimetine súıenip habarlaıdy. 

15 qyrkúıekte saǵat 10.00-den bastap qala turǵyndary men qonaqtary Almaty Murajaıynda «Almaty peterborlyq sýretshiler kózimen» atty kórmeni tamashalap, peterborlyq sýretshilerdiń týyndylaryn kóre alady. Dál sol kúni saǵat 18:00-de Jambyl atyndaǵy Qazaq memlekettik fılarmonıasynda I.Morılend pen G.Úzenbaevtyń fortepıanalyq dýet keshi ótedi, al 19.30-da M. Lermontov atyndaǵy drama teatrynda 85-shi mereıli maýsym bastalady.

15, 16 qyrkúıek kúnderi saǵat 19.00-de Abaı atyndaǵy MATOB-ta klasıkalyq ónerdi baǵalaıtyndar úshin álemdik balet keshi kórermenderin kútedi. 16 qyrkúıekte zamanaýı otandyq mýzyka áýesqoılary úshin qazaqstandyq «Gakku daýsy» festıvali ótedi.

Qala kúni - 17 qyrkúıekte saǵat 10-00 de Qazaqstan Respýblıkasynyń Tuńǵysh Prezıdenti atyndaǵy saıabaqta jyl saıyn 200 myńǵa deıin Almaty turǵyndary men qonaqtaryn jınaıtyn qalalyq dástúrli «ALMAFest-2017» alma festıvali ótedi. Festıvál mańynda 100 tonnadan astam almanyń dámin tatyp, satyp alýǵa bolady, sonymen qatar ashyq aspan astynda túrli sport, kórkem, mýzyka alańdary jumys isteıdi, bularda sheberlik synyptary, balalar jáne otbasylyq oıyndar uıymdastyrylady. Kórme aýmaǵynda qolónershiler kelýshilerge ózderi jasaǵan zergerlik buıymdaryn usynady, sonymen qatar osy jerden qolóner sheberleriniń aksesýarlaryn, fýrnıtýralaryn alýǵa bolady.

Dál osy kúni «Almaty Arenada» saǵat 17:00-de otandyq jáne sheteldik estrada juldyzdarynyń qatysýymen «EMA-2017» Evrazıalyq mýzykalyq syılyǵy ótedi.

Qala kúnine oraı Almatynyń tarıhı ortalyǵynyń úshten birin jańartý jumystaryn aıaqtaý josparlanǵan. Qaıta jasalǵan Panfılov, Kabanbaı batyr men Gogol kóshelerinde aryq pen jaýyn júıeleri jańǵyrtyldy, nysandardyń syrtqy kelbeti biryńǵaı áesm kelbetke endi jáne kishi pishindi arhıtektýrlyq formalar, qurǵaq fontandar ornatylyp, balalar jáne sport alańdary jasaldy.

Jaqynda ǵana Qala kúnine oraı qaıta jasalǵan «Astana» alańy, Naýryzbaı aýdanynyń ákimshilik- iskerlik ortalyǵy, «Open Almaty» qoǵamdyq qabyldaý nysany ashylǵan edi.

Aıta keterligi, bıylǵy jyly ár aýdanda 472 jańa aýlalar jáne ekiden júrginshi aımaqtary paıda bolady. Jyl aıaǵyna deıin 102 ótpeli jol retke keltirilip, tún mezgilinde olarǵa jaryq beriledi. Qalada 317km sý qubyrlary men 265 km káriz jelilerin júrgizý jáne qaıta jasaý úshin qarjy bólingen.