Almatyda Darıǵa Nazarbaeva bastaǵan birqatar senatorlar QR UQK Shekara qyzmeti akademıasynda boldy. Oqý ornymen tanysý barysynda senator basshylyqpen ashyq áńgime bolǵanyn, aldaǵy ýaqytta qajetti kómek kórsetiletinin aıtty, dep habarlaıdy Qamshy.kz aqparat agenttigi.

Aıta keteıik, qyrkúıektiń 18-19 kúnderi QR Parlamenti Senatynyń Halyqaralyq qatynastar, qorǵanys jáne qaýipsizdik komıteti memlekettik shekara kúzeti máseleleri boıynsha kóshpeli keńes ótkizdi. Darıǵa Nazarbaeva bastaǵan birqatar senatorlar Almaty men Almaty oblysyndaǵy áskerı oqý oryndary men shekara, keden beketterinde boldy. Búgin Qurlyq áskerleriniń áskerı ınstıtýty jumysymen tanysqannan keıin, kóshpeli keńes QR Ulttyq qaýipsizdik komıteti shekara qyzmeti akademıasynda bolyp, onda depýtattar kýrsanttar men oqytýshy qurammen kezdesti.

«Qazirgi ýaqytta damyǵan elderdiń qarýly kúshteri qymbat tehnıkalar men elektronıkamen jabdyqtalýda. Men qarýly kúshterimiz de, sarbazdarymyz da kompúterdi, aqparattyq tehnologıany ıgerip, barynsha elektronıkamen jabdyqtalýy kerek degen pikirdemin. Sardarlarmen sóıleskenimde olar búgingi sarbaz elektronıkany da, balama tehnıkany da ıgerýi qajet degen pikir aıtty. Sebebi, qarýly jattyǵý kezinde elektronıka ózin únemi jaqsy jaǵynan kórsete bermeıdi. Sondyqtan, tıimdiligi joǵary eski tehnıkalardy da ıgerý mańyzdy. Elimizdiń qorǵanys qabiletin arttyrý óte úlken qarajatty qajet etetinin bilemiz. Myqty armıa soǵys úshin emes, qorǵanys úshin qajet» - dedi senator.

Depýtattardy atalǵan áskerı ınstıtýt basshysy polkovnık Serik Asanov qarsy alyp, oqý ornynyń tarıhy men búgingi ahýalyn baıandap berdi. «Qurlyq áskerleriniń áskerı ınstıtýty 1970 jyly qurylǵan. 2003 jyly QR Úkimetiniń №1080 qaýlysymen QR QK Almaty joǵary áskerı ýchılıshesi Qurlyq áskerleriniń áskerı ınstıtýty bolyp ózgertildi. Oqý ornynyń basty mindeti - qurlyq áskerleriniń qurylymdaryna  joǵary mamandandyrylǵan ofıserlerdi ázirleý. Instıtýt ofıserlerdi 14 mamandyq boıynsha daıyndaıdy», - dedi Serik Asanov.

Instıtýt basshysynyń aıtýynsha, oqý orny zamanaýı oqý-materıaldyq bazamen, tehnıkalyq oqý quraldarymen tolyqtaı qamtamasyz etilgen.

Instıtýt jumysyn aralaý barysynda Darıǵa Nazarbaeva «T72, T72B» tankileriniń maketindegi avtomattandyrylǵan atý quralymen nysanany kózdep, birneshe oq atty.

«Osyndaı qurylǵylar arqyly qarajatty únemdeýge bolady. Biraq polıgonda oqý, atý jattyǵýlarynan ótý - ol múlde basqa. Munda oıyn avtomatynda otyrǵandaı kúıde boldym», - dedi Darıǵa Nazarbaeva.  QR Halyq qaharmany,

Senat depýtaty Talǵat Musabaev Darıǵa Nazarbaevanyń bul jattyǵýyn áskerı adam retinde joǵary baǵalady.

«Darıǵa NursultanqyzyT72 oqý-jattyǵý tankisiniń kabınasyna kirip, oq atty. Jaqsy nátıje kórsetti. Úlgili kýrsanttyń tapsyrmasyn oryndady, ony kez kelgenimiz birden jasaı almas edik. Birinshi ret otyryp turǵan adam mundaı nátıje kórsetkeni, onyń negizi bar ekenin kórsetedi. Komıtet tóraıymynyń ózi kelip, jaǵdaıdy kózimen kórýi bul jaqsy dúnıe», - dedi Talǵat Musabaev.  

Aıta keteıik, oqý orny jyl saıyn 400 kýrsant qabyldaıdy. Aqyly oqý túri joq. Orta mektep bitirgen túlekter UBT nátıjesimen qosymsha emtıhandar tapsyrady.