Ulttyq ulannyń 20 jaýyngeri «Kúreń beret» ıegeri atandy, - dep habarlaıdy Qamshy.kz aqparat agenttigi QR Ulttyq ulan baspasóz qyzmetine silteme jasaı otyryp.

 Búgin Qazaqstan Respýblıkasy Ulttyq ulany «Qaptaǵaı» oqý ortalyǵynda eki kúndik  synaqtan ótken jaýyngerlerge Qazaqstan Respýblıkasy Ulttyq ulanynyń arnaıy maqsattaǵy «Búrkit» bólinisi áskerı qyzmetshileriniń kúreń beret kıý mártebesi jáne «Búrkit» keýde belgisin taǵýǵa qol jetkizý úshin qorytyndy kvalıfıkasıalyq synaq tapsyrý sharasy ótti. Sharaǵa QR Qaýipsizdik Keńesiniń áskerı qaýipsizdik jáne qorǵanys bóliminiń jetekshisi general-maıor Mýslım Altynbaev, Ulttyq ulan Bas qolbasshysy general-leıtenant Rýslan Jaqsylyqov, elimizdiń kúsh qurylymy arnaıy bólimsheleriniń, memlekettik organdardyń, buqaralyq aqparat quraldary ókilderi qatysty.

«Búrkit» bólinisi áskerı qyzmetshileriniń kúreń beret kıý kvalıfıkasıalyq synaqtary jyl saıyn elimizdiń ár túrli klımattyq beldeýinde ótedi jáne eki kezennen turady.  Osy joly Astanada ótken synaqta kúreń beretke úmitkerler bas-aıaǵy  19 normatıvti oryndady.  Onyń ishinde qarý-jaraǵymen 75 shaqyrymdyq qashyqtyqty  júgirip shyǵý, sýly ótkeldi maltyp ótý, tájirıbelik atys jáne belgilengen ýaqyt ishinde úsh qarsylaspen urysqa túsý normatıvteri bar.

Bıyl elimizdiń barlyq óńirinen kelgen kúreń beret kıýge  úmitker eki júzge jýyq áskerı qyzmetshi kvalıfıkasıalyq synaq tapsyrýǵa ynta tanytty.  Onyń tek 91-i ǵana jarys jolyna jiberildi. Eki kúndik synaqtan soń 18 jaýynger aqtyq synǵa deıin jetken bolatyn.

Sondaı-aq, bıyl atalmysh  synaqty sapaly ótkizý maqsatynda jáne kúreń beretke úmitkerlerdiń normatıvterdi oryndaýyn baqylaý úshin    onyń barlyq kezeńinde  «Kúreń beret» Ortalyq keńesiniń músheliginde turǵan 37 nusqaýshy jáne aǵa nusqaýshylar tartyldy.

Olarǵa saltanatty jaǵdaıda kúreń beret pen «Búrkit» keýde belgisi tabys etildi. Osy joly synaqtan súrinbeı ótken 18 jaýyngerden bólek, arnaıy maqsattyń eki jaýyngeri kúreń beret kıý mártebesine ıe boldy. Olar Almaty jáne Aqtóbe qalasynda ótken  arnaıy operasıalarda erlik kórsetkender. Sonymen bıylǵy jyly 20 jaýynger kúreń beret ıesi atandy.

- Kúreń beret kıý mártebesi ıesine eshqandaı materıaldyq kómek alyp kelmeıdi. Olardyń jalaqysy burynǵysha qala bermek. Olar tek Otandy qorǵaý kezinde alǵy shepke shyǵyp, alǵashqylardyń biri retinde attanýǵa quqyǵy bar. Bul tek Otanǵa rıasyz berilgen azamattar retinde bolyp qala beredi. Bizdiń maqsatymyz osyndaı azamattardy iriktep, elimizdiń tynyshtyǵyn qamtamasyz etý,-dedi general-leıtenant Rýslan Jaqsylyqov, jýrnalıserge arnalǵan brıfıńte.