Ortalyq komýnıkasıalar qyzmetinde «Qazaqstan» Ulttyq arnasynda 30 qyrkúıekten bastap efırge shyǵatyn «Jibek Joly Juldyzy» halyqaralyq mýzykalyq saıysty shoýǵa arnalǵan baspasóz konferensıa ótkizildi. Atalǵan sharaǵa «Qazaqstan» RTRK» AQ-nyń basqarma tóraǵasy – Erlan Qarın jáne «Adam Media Plus» kompanıasynyń bas prodúseri Dınara Adam qatysty dep habarlaıdy Qamshy.kz aqparat agenttigi.

         Ulttyq arnada jańa maýsym aıasynda Uly Jibek Jolynyń boıynda ornalasqan Qazaqstan, Qyrǵyzstan, Tájikistan, Ózbekstan, Túrkıa, Ázirbaıjan, Grýzıa, Reseı Federasıasynyń: Tatarstan,  Bashqurstan sıaqty elderdiń jarqyn juldyzdary bir sahnada baq synasatyn aýqymdy halyqaralyq óner dodasy bastalady. «Jibek Joly Juldyzy» Qazaqstanda buryn sońdy bolmaǵan halyqaralyq megasaıys.

          Joba zamanaýı mýzykalyq kontenttiń alýan túrliligi men aýqymnyń keńdigimen ǵana erekshelenbeıdi. Aldymen ol qatysýshy elderdiń erekshe dástúrleri men mádenıetteriniń baılanysýy arqyly búkil túrki tildi álemge ortaq medıa-ınfraqurylymynyń damýyna septigin tıgizedi. Sebebi, «Jibek Joly Juldyzy» megajobasynyń basty maqsaty Uly Jibek joly boıyndaǵy memleketterdiń qarym-qatynasyn biriktirý, jańa mýzykalyq dástúrdi ornatý.

          «Jibek Joly Juldyzy» Ulttyq arnada birneshe aı boıyna aptasyna bir ret kórsetiletin bolady. 12 konsertten turatyn megadodanyń aqtyq saıysynda tek talantty ánshi ǵana emes, ony usynǵan el de fınal jeńimpazy bolyp sanalady.

          Televızıalyq shoý jobaǵa qatysýshy elderdiń reıtıńi joǵary telearnalarynda da kórsetiledi.

          «Jibek Joly Juldyzy» saıystyq shoýdyń qazylar alqasynyń quramyna qatysýshy elderdiń halyqaralyq deńgeıdegi eń tanymal kásibı ártisteri men prodúserleri kiretin bolady.

          Fınal, 12-shi konsertte - joba saıyskerleri jáne shaqyrylǵan juldyzdardyń qatysýymen «Qazaqstan» telearnasynyń kórermenine arnalǵan úlken gala-konsert retinde uıymdastyrylady.