TMD elderi úshin terorıstik toptar tarapynan keletin qaýiptiń deńgeıi áli de joǵary bolyp tur. Bul jaıynda Antıterrorıstik ortalyqtyń baspasóz qyzmeti málimdedi.

Bakýde TMD elderiniń qaýipsizdik qyzmetiniń ár aımaq basshylary, quqyq qorǵaý qyzmetkerleri qatysqan jetinshi aımaqtyq saraptamalyq konsýltasıa ótýde. Sonymen qatar, Ázirbaıjan eliniń Qaýipsizdik qyzmetiniń qoldaýymen qurylǵan Antıterrorlyq ortalyqtyń keńeıtilgen jınalysy bolyp jatyr.

«Sarapshylardyń aıtýynsha, TMD elderi úshin terorıstik qaýip deńgeıi seıilgen joq. Búgingi tańda túrli uıymdar jastardy terorıstik toptarǵa shaqyrý úshin ınternet-resýrstardy keńinen paıdalanýda. Sonymen qatar, olarǵa qarsy kúsh jumyldyrý úshin de ǵalamtordyń paıdasy kóp», - delingen baspasóz habarlamasynda.

Antıterrorlyq ortalyq júrgizgen saraptama nátıjesine sáıkes, TMD elderinde qol jetkizýge tyıym salynǵan resýrstardyń 90%-y TMD elderinen tys jerlerde ornalasqan.