Almatyda «Alash» partıasynyń qurylǵanyna 100 jyl tolýyna oraı «Aıbynym Alash» atty shyǵarmashylyq kesh uıymdastyrylyp, onda Alash qaıratkerleriniń óleńderi oqyldy,- dep jazady Qamshy.kz aqparat agenttigi.
Keshti Qazaqstan Jazýshylar odaǵy tóraǵasynyń orynbasary Ǵalym Jaılybaı ashty. «Alash arystarynyń keıingi urpaqqa qaldyrǵan murasy ushan-teńiz. Búgingi is-shara sol murany Almaty qalasynyń turǵyndaryna nasıhattaý úshin ótkizilip otyr» dedi ol.
Atalǵan is-sharada Temirbek Júrgenov atyndaǵy Óner akademıasynyń, Júsipbek Elebekov atyndaǵy Respýblıkalyq estrada-sırk kolejiniń stýdentteri, Sátbaev ýnıversıtetiniń «Báısheshek» ádebı birlestiginiń ónerpazdary, Abaı atyndaǵy Respýblıkalyq mamandandyrylǵan daryndy balalarǵa arnalǵan qazaq tili men ádebıetin tereńdete oqytatyn orta mektep-ınternattyń oqýshylary, jas aqyndar óner kórsetti. Olar Ahmet Baıtursynov, Mirjaqyp Dýlatov, Maǵjan Jumabaev, Beıimbet Maılın, Sultanmahmut Toraıǵyrov syndy alash qaıratkerleriniń óleńderin kompozısıalyq qoıylym túrinde obrazben oryndady. Jas aqyndar toby alashtyqtarǵa, onyń ishinde Álıhan Bókeıhanov, Mirjaqyp Dýlatovtarǵa arnap óleńder oqydy. Shyǵarmashylyq kesh barysynda qonaqtarǵa alashtanýshy-ǵalym Bolat Múrsálim túsirgen «Alashtyń on ekinshi jeltoqsany» derekti fılmi kórsetildi. Kórermender fılmnen Mustafa Shoqaı men Álimhan Ermekovtyń jandy daýsyn estip, bir tebirenip qaldy.
Alashordanyń bir ǵasyrlyq mereıtoıyna arnalǵan keshti T.Júrgenov atyndaǵy Óner akademıasynyń «Sahna tili» kafedrasynyń meńgerýshisi, profesor, Qazaqstannyń eńbek sińirgen qaıratkeri Darıǵa Turanqulova qorytyndy sózben aıaqtady. «Men sahna óneriniń mamany retinde, búgingi keshke óte joǵary baǵa beremin. Kóp jurt tek jeńil mýzykaǵa áýestenip jatqanda, sizderdiń osyndaı salıqaly is-shara ótkizip jatqandaryńyz úlken eńbek. Sizderge barlyq kezde shyǵarmashylyq tabys tileımin» dep ol júrekjardy lebizin bildirdi.
Qatysýshylardyń barlyǵy keshten oljaly qaıtty. Olardyń árqaısysyna ishinde 400-den astam tarıhı fotolar jınaqtalǵan «Alashorda» fotoalbomy men Alǵys hattar tabys etildi. «Alashorda» fotoalbomynyń jaryqqa shyǵýyna «Samuryq-Qazyna» ál-aýqat qory demeýshilik jasady.
Sonymen qatar shyǵarmashylyq kesh aıasynda Qazaqstan Respýblıkasy Ulttyq kitaphanasynyń qoldaýymen «Alash» partıasynyń júz jyldyq mereıtoıyna oraı kitap kórmesi ótkizildi. Kórmege alash arystarynyń ózderi jazǵan eńbekter men búgingi ǵalymdardyń alashtaný taqyrybynda qurastyrǵan júzdegen kitaptary qoıyldy.
Aıta keteıik, «Aıbynym Alash» atty shyǵarmashylyq keshti Almaty qalasy İshki saıasat basqarmasynyń tapsyrysy boıynsha «El-shejire» qoǵamdyq qory uıymdastyrdy.
