Qazaqstan Prezıdenti Máskeý memlekettik halyqaralyq qatynastar ınstıtýtynyń túlekterimen kezdesti, dep habarlaıdy Qamshy.kz aqparat agenttigi Aqordanyń baspasóz qyzmetine silteme jasap.

Kezdesýge Parlament Senatynyń tóraǵasy Q.Toqaev, Reseı Federasıasynyń Syrtqy ister mınıstri S.Lavrov, Máskeý memlekettik halyqaralyq qatynastar ınstıtýtynyń rektory A.Torkýnov, ERG kompanıasy dırektorlar keńesiniń múshesi P.Shodıev, Qazaqstannyń Syrtqy ister mınıstri Q.Ábdirahmanov qatysty.

Áńgime barysynda Nursultan Nazarbaev Máskeý memlekettik halyqaralyq qatynastar ınstıtýtynyń mártebesi erekshe ekenin aıtyp, onyń dıplomattar men syrtqy saıasat vedomstvolary qyzmetkerleriniń arasyndaǵy bedeli joǵary ekenin atap ótti.

"Máskeý memlekettik halyqaralyq qatynastar ınstıtýty únemi kópshilik bilim alýǵa umtylatyn aıryqsha oqý orny boldy. Jastarymyz qazir de sonda oqyǵandy qalaıdy. Biz Máskeý memlekettik halyqaralyq qatynastar ınstıtýtymen jáne Astanada fılıaly bar Máskeý memlekettik ýnıversıtetimen tıimdi baılanystar ornattyq", - dedi Memleket basshysy.

Qazaqstan Prezıdenti memleketaralyq dıalogty nyǵaıtý máselesine toqtalyp, dıplomatıalyq kadrlardy Eýrazıalyq ekonomıkalyq odaqtyń jumysyna tartý qajettigin aıtty.

Kezdesýge qatysýshylar Astanada ótip jatqan Máskeý memlekettik halyqaralyq qatynastar ınstıtýty túlekteriniń IV halyqaralyq forýmynyń aýqymdylyǵy men onyń elderimiz arasyndaǵy dıplomatıalyq baılanystardy kúsheıtýdegi rólin atap ótti.