Qazaqstan Respýblıkasynyń Prezıdenti Nursultan Nazarbaev Sochı qalasynda ótip jatqan TMD-ǵa múshe memleketterdiń basshylary keńesine qatysyp jatyr, dep Qamshy.kz aqparat agenttigi QazAqparatqa silteme jasap  habarlaıdy.

Sálemdesý jáne birge fotosýretke túsý rásiminen keıin memleket basshylary shaǵyn jáne keńeıtilgen quramda otyrys ótkizedi. Samıttiń kún tártibine Dostastyq aıasynda ózara tıimdi seriktestikti budan ári tereńdetý, sonymen qatar ony qazirgi zamannyń talaptaryna beıimdeý máseleleri engizilgen. Memleket basshylary otbasy ınıstıtýty men dástúrli otbasylyq qundylyqtardy qoldaý týraly málimdeme jasaıtyn bolady.

Samıt barysynda memleket basshylary Armenıanyń Gorıs, Belarýstiń Brest jáne Qazaqstannyń Shymkent qalalary sekildi iri shaharlar arqyly memleketaralyq «Yntymaqtastyqtyń mádenı astanasy» baǵdarlamasyn júzege asyrý týraly sheshim qabyldaıdy dep kútilip otyr. Sonymen birge, prezıdentter qaýipsizdik, qorǵanys, sybaılas jemqorlyqqa qarsy kúres, beıbit maqsatta ǵaryshty zertteý jáne qoldaný, mádenı-gýmanıtarlyq seriktestik salalary boıynsha qarym-qatynasty kúsheıtý máselelerine nazar aýdaryp, 2018 jyly TMD-nyń tóraǵalyǵy máselesin talqylaıdy.

Sondaı-aq Memleket basshylary TMD-nyń joǵarǵy organdarynyń quzyretterin jikteýge baǵyttalǵan birqatar sheshimderge qol qoıý josparlanǵan. Bul qujattardy qabyldaý arqyly Memleket basshylarynyń keńesi sáıkesinshe quzyretterdi Úkimet basshylarynyń keńesine, syrtqy ister mınıstrlerine, qorǵanys vedomstvolary men Ekonomıkalyq keńeske tabystaı otyryp, Yntymaqtastyqtyń damý strategıasynyń negizgi máselelerin talqylaı alady. Aıta keterligi, 2015 jyly TMD elderiniń Býrabaıda ótken samıtinde Qazaqstan Prezıdenti Nursultan Nazarbaev TMD-ny transoformasıalaý bastamasyn kótergen bolatyn. Budan keıingi Bishkekte ótken kelesi kezdesýde Yntymaqtas elderdiń basshylary atalǵan ıntegrasıalyq birlestikti qazirgi zamannyń talabyna sáıkes beıimdeý týraly sheshim qabyldaǵan.