Keshe  M.Áýezov atyndaǵy Qazaq Memlekettik akademıalyq drama teatry 92-shi  maýsymynyń ashylýyna oraı Elbasy N.Á.Nazarbaevtyń «Rýhanı jańǵyrý» baǵdarlamasynyń jáne uly jazýshy M.Áýezovtiń 120 jyldyǵy aıasynda  «Teatr álemindegi rýhanı jańǵyrý»  atty Almaty qalasyndaǵy 8 teatrdyń basyn qosqan kórmeni saltanatty túrde ashty dep habarlaıdy Qamshy.kz aqparat agenttigi.

Kórmeniń ashylý saltanatynda Áýezov teatrynyń kórkemdik jetekshisi, Qazaqstannyń Eńbek Eri, KSRO halyq artısi Asanáli Áshimov quttyqtaý lebizin jetkizdi. Ǵ.Músirepov atyndaǵy Qazaq Memlekettik akademıalyq balalar men jasóspirimder teatrynyń dırektory Sábıt Ábdihalyqov, Abaı atyndaǵy Qazaq Memlekettik akademıalyq opera jáne balet teatry dırektorynyń orynbasary Qanat Qarajanov ujymdarynyń atynan aq peıil, aqjarma tilekterin jetkizdi.

Quttyqtaý sózderinen soń kórmeniń lentasy qıylyp, Áýezov teatry «Mýzeı» bóliminiń jetekshisi Nargız Tamabekqyzy kórmege qoıylǵan qundy jádigerlermen tanystyrdy.

Bul kórmeniń maqsaty –  óskeleń urpaqqa, teatr ónerine  qyzyǵatyn izdenýshilerge, jalpy ónersúıgish qaýymǵa qazaq óneriniń qarashańyraǵy, 92 jyldyq tarıhy bar M.Áýezov atyndaǵy Qazaq Memlekettik akademıalyq drama teatrynyń qurylǵan kezeńinen bastap búgingi kúnge deıingi óner shejiresinen syr shertip jáne Almaty qalasynda ornalasqan mádenı ordalardyń basyn qosý arqyly olardyń tarıhyn bir arnada toǵystyryp, teatr mýzeıiniń tynys-tirshiliginen habar bere otyryp, mol mura, qundy jádigerleri týraly  maǵlumat berý.

Kórmege qazaq óneriniń qarashańyraǵy – M.Áýezov atyndaǵy Qazaq Memlekettik akademıalyq drama teatry, Abaı atyndaǵy Qazaq Memlekettik akademıalyq opera jáne balet teatry, Ǵabıt Músirepov atyndaǵy Qazaq Memlekettik akademıalyq balalar men jasóspirimder teatry, Respýblıkalyq nemis drama teatry, Memlekettik Respýblıkalyq koreı mýzykalyq komedıa teatry, N.Sas atyndaǵy Memlekettik orys balalar men jasóspirimder teatry, Q.Qojamárov atyndaǵy uıǵyr mýzykalyq komedıa teatry jáne  M.Iý. Lermontov atyndaǵy Memlekettik akademıalyq orys drama teatrynyń qundy jádigerleri qoıyldy.

8 teatr mýzeıiniń basyn qosyp kórme uıymdastyrýdyń maqsaty – ult rýhanıatynyń tutastyǵyn tý qylyp, elimizdegi barlyq teatrlardyń mýzeıindegi qundylyqtar men jádiger-muralardyń basyn biriktiretin respýblıkalyq deńgeıde kórme uıymdastyrý. Bul qazaq teatr ónerindegi ulttyq qazynamyzdyń qaınar bulaǵy, jańǵan shyraǵy bolmaq.