Bıyldan bastap bala asyrap alǵysy keletin ata-analardyń úmitker retinde elektrondy tirkeýge turyp, jetim jáne ata-anasynyń qamqorlyǵynsyz qalǵan balalardyń elektrondyq derekqory arqyly izdeı alady. Sonymen qatar, tamyz aıynan bastap zańdy keńester usynatyn zań qyzmeti quryldy. Ortalyq mamandary ótinish bergen klıentterge ǵana emes, telefon arqyly habarlasqan azamattarǵa da bastapqy quqyqtyq keńester beredi dep habarlaıdy Qamshy.kz aqparat agenttigi.

Bul týraly Ortalyq Komýnıkasıalar Qyzmetinde ótken baspasóz konferensıasynda QR Bilim jáne ǵylym mınıstrligi Balalardyń quqyqtaryn qorǵaý komıtetiniń tóraǵasynyń m.a. Erjan Ersaıynov málimdedi.

- Mundaı tártipti engizý balalardy asyrap alǵysy keletin otbasylarǵa quqyqtyq jáne uıymdastyrýshylyq kómek pen psıhologıalyq-pedagogıkalyq qoldaý kórsetýde úlken kómek bolady. Sonymen qatar, bul arqyly biz bala tárbıeleýde paıda bolǵan kedergilerdi ýaqytyly joıyp, balanyń ınternattyq mekemelerge qaıtarylýyna jol bermeıtin edik. Taǵy bir aıta ketetin jaıt, qoǵamda jetimderdi jylatpaýǵa jáne ata-anasynyń qamqorlyǵynan aıyrylmaýyn aldyn alyp, ómirlik qıyndyqtarǵa dýshar bolǵan otbasylarmen jumys jasaıtyn áleýmettik patronaj qyzmeti óz isin bastady. Bul prosester qoldanystaǵy zańnamaǵa birqatar ózgerister engizýdi qajet etedi», - dedi QR Bilim jáne ǵylym mınıstrligi Balalardyń quqyqtaryn qorǵaý komıtetiniń tóraǵasynyń m.a. Erjan Ersaıynov.

Mınıstrlik ókiliniń aıtýynsha elimizde 27 myń jetim jáne ata-anasynyń qamqorlyǵynsyz qalǵan bala bar. Bul elimiz boıynsha jalpy bala sanynyń 0,5% quraıdy. Onyń ishinde 21 myń bala (75%) qazaqstandyq azamattardyń qamqorlyǵymen asyrap alynsa, 6 myńnan astamy (25%) jetim jáne ata-anasynyń qamqorlyǵynsyz qalǵan balalarǵa arnalǵan 140 mekemede tárbıelenip jatyr.