QR Din isteri jáne azamattyq qoǵam mınıstri Nurlan Ermekbaev jastar saıasatyn júzege asyrýmen aınalysatyn vedomstvo basshylarynyń Halyqaralyq mınıstrlik kezdesýine qatysty. Máskeý qalasynda ótken kezdesý álemniń 70-ten asa eliniń ókilderiniń basyn qosty dep habarlaıdy Qamshy.kz aqparat agenttigi.
Atalǵan kezdesýdiń maqsaty – jastar aldynda turǵan qazirgi zamanǵy qaýip-qaterlerge qarsy turý boıynsha vedomstvolardyń biresken is-áreketin úılestirý bolyp tabylady.
Qatysýshylar aldynda BUU Bas hatshysynyń jastar isi jónindegi ókili Djaıatma Vıkramanaıake hanym quttyqtaý sóz sóıledi. Sondaı-aq, ashylý saltanatynda Reseı Federasıasy Úkimeti tóraǵasynyń orynbasary Vıtalıı Mýtko, Reseı Federasıasy Bilim jáne ǵylym mınıstri Olga Vasıleva, Reseıdiń jastar isi jónindegi federaldyq agenttiginiń jetekshisi Aleksandr Býgaev, M. Lomonosov atyndaǵy Máskeý memlekettik ýnıversıtetiniń rektory Vıktor Sadovnıchıı sóz sóıledi.
N. Ermekbaev «Halyqaralyq qaýipsizdik» taqyrybyndaǵy paneldik dıskýssıada sóz sóılep, mınıstrlik tarapynan memlekettiń zaıyrlylyq qaǵıdalaryn nyǵaıtý jáne radıkalızmniń aldyn-alýdaǵy zańnamany jetildirý boıynsha atqarylyp otyrǵan jumysty baıandady.
Mınıstr jastar arasyndaǵy aldyn-alý jumystaryn júrgizýge basa nazar aýdardy.
«Jastarǵa buqaralyq mádenıet jáne Internet kúshti yqpal etedi. Búgingi kúni túrli radıkaldy uıymdardyń 80%-yn 30 jasqa deıingi jastar quraıdy. Osyǵan oraı, elimizde jáne jalpy halyqaralyq jastar yntymaqtastyq júıesinde jastardy baǵyttaýǵa jáne yntalandyrýǵa arnalǵan qundylyqtardy qalyptastyrýdyń tıimdi júıesi bolǵany mańyzdy», - dep atady óz sózinde Nurlan Ermekbaev.
Mınıstr otbasylyq tárbıe júıesin nyǵaıtý boıynsha áleýmettik jobalardy damytý múmkindigine nazar aýdartty.
«Bizdiń halyqaralyq deńgeıdegi jobalardy iske asyrý úshin qajetti ınfraqurylymymyz bar jáne barlyqtaryńyzdy jastar saıasaty salasyndaǵy ÚEU resýrstaryn tartýmen yntymaqtastyqqa shaqyramyz. Búgin bizdiń elderimiz SHYU jastar keńesi, Túrki keńesi jáne TMD elderi keńesiniń aıasynda ózara qarym-qatynas jasaıdy. Osy alańdarǵa ár qatysýshy memleket shyǵyndaryn ózderi óteıdi. Sonymen birge, bizdiń operatordyń negizinde qarjylandyrý júıesin jáne atalǵan alańdar is-sharalaryn úılestirýdi ortalyqtandyrýǵa bolady», - dep óz pikirin bildirdi mınıstr N. Ermekbaev.
Budan ózge, Nurlan Ermekbaev is-sharaǵa áli qatyspaıtyn elder mınıstrleriniń arasynda barlyq atalǵan alańdardyń jumys josparlaryn taratýdy usyndy. Osylaısha, alynǵan usynystar halyqaralyq qaýipsizdik máselelerin tıimdi sheshýge kómektesetinine senim bildirdi. Sonymen qatar, mınıstr túrli ózekti suraqtar boıynsha turaqty onlaın-keńester uıymdastyrý arqyly birlesken jumystyń formatyn jetildirýdi usyndy.
Eske sala keteıik, Halyqaralyq Mınıstrlik kezdesý 15 qazan kúni Sochı qalasynda bastalatyn XIX Búkilálemdik jastar men stýdentterdiń festıvali qarsańynda ótip otyr.
