Reseı Federasıasyna jumys sapary aıasynda Qazaqstan Respýblıkasynyń Din isteri jáne azamattyq qoǵam mınıstri Nurlan Ermekbaev búkil Reseı jáne Máskeý Patrıarhy Kırıllmen kezdesti dep habarlaıdy Qamshy.kz aqparat agenttigi.

Kezdesý barysynda Nurlan Ermekbaev Reseı jáne Máskeý Patrıarhyn Qazaqstan Respýblıkasy men Reseı halyqtarynyń arasyndaǵy beıbitshilik, dostyq pen yntymaqtastyqty nyǵaıtý jolyndaǵy eńbegi úshin Qazaqstan Respýblıkasynyń Prezıdenti Nursultan Nazarbaev tabystaǵan birinshi dárejeli «Dostyq ordeni» memlekettik nagradasyna ıe bolýymen quttyqtady.

«Búgingi kúni barlyq konfesıalardyń ózara túsinistik pen ashyq dıalog negizindegi yntymaqtastyǵy bizdiń  basty jetistikterimizdiń biri bolyp tabylady jáne buny Qazaqstannyń aıtýly tabysy - dep aıtýǵa bolady.  Árıne, osyndaı qarym-qatynastardy ornatý ońaıǵa túspedi,  konfesıaaralyq tıimdi dıalogqa qol jetkizýde eki jetekshi din – Islam hanafı mazhaby jáne pravoslavıe erekshe ról atqarady» - dep óz kózqarasyn bildirdi N.Ermekbaev.

Mınıstr Qazaqstan Respýblıkasynyń Din isteri jáne azamattyq qoǵam mınıstrligi barlyq dinı birlestiktermen konstrýktıvti dıalog ornatqanyn jáne onyń ishinde Orys Pravoslavıe Shirkeýine  jáne onyń jumysyna, qoldaý tanytatynyn atap ótti.  

«Biz zańnamany jetildirý, azamattyq qoǵamdy damytý, dinı birlestiktermen tyǵyz qarym-qatynas ornatý  arqyly memlekettik saıasatty júzege asyramyz», - dedi mınıstr.

Nurlan Ermekbaev qazirgi zamanaýı talaptarǵa sáıkes konfesıaaralyq jáne dinaralyq dıalogtyń damýy, adam men qoǵamnyń dástúrli moraldyq-adamgershilik qundylyqtarynyń saqtalýy, memlekettik saıasat qaǵıdalaryn qurmetteý turǵysynda atqaryp otyrǵan Orys Pravoslavıe Shirkeýiniń jumysyn joǵary baǵalady. Sondaı-aq mınıstr, Orys Pravoslavıe shirkeýiniń ókilderine Astanada ótken dinaralyq forýmdardyń jumysyna únemi qoldaý kórsetip, belsendi qatysqany úshin alǵysyn bildirdi.