Astanadaǵy halyqaralyq áýejaıǵa 23,6 mln teńge mólsherinde aıyppul salyndy, dep habarlaıdy Qamshy.kz aqparat agenttigi 24.kz portalynyń málimetine súıenip.
Bul týraly tabıǵı monopolıalardy retteý, básekelestikti jáne tutynýshylardyń quqyqtaryn qorǵaý komıtetiniń resmı saıtynda jarıalandy. Ondaǵy aqparatqa saı, áýejaıdyń birneshe kelisimshart jasaýda zańsyz áreketterge barǵany anyqtalǵan.
Atap aıtqanda, munaı ónimderin saqtaý úshin qoldanylatyn ydystardy jalǵa alý sharttary buzylǵan. Sondaı-aq avıasıadyq otyndy satýǵa qatysty kelisimderdiń de erejege saı oryndalmaǵany belgili boldy.
Aıta keteıik, Astana qalasynyń ákimshilik soty osy jyldyń tamyz aıynda áýejaıǵa aıyppul salý jóninde sheshim shyǵarǵan edi. Al aksıonerlik qoǵam basshylary munymen kelispeı, apelásıalyq shaǵym túsirgen bolatyn. Alaıda Astana qalalyq soty sheshimdi ózgerissiz qaldyryp, áýejaıdy ákimshilik jaýapqa tartý jóninde sheshim shyǵardy.
