Qazaq memlekettik sırkinde Almaty qalasanyń ákimi atynan jańa jyldyq shyrsha ótip, oǵan 1700–den astam bala – oqý ozattary, balalar úıleriniń tárbıelenýshileri, turmysy tómen otbasylar balalary men múmkindigi shekteýli baldyrǵandar qatysty.
Kishkentaı qalalyqtardy kele jatqan jańa jylmen quttyqtaý úshin merekelik sharaǵa Almaty ákimi Baýyrjan Baıbek keldi.
«Biz únemi jas almatylyqtardyń jetistikteri týraly úlken maqtanyshpen aıtamyz. Sender jyl saıyn halyqaralyq olımpıadalarda, ǵylymı jobalar konkýrstarynda úlken marapattarǵa ıe bolyp kelesińder. Tek 2017 jyldyń ózinde ǵana almatylyq oqýshylar 61 altyn, 76 kúmis, 90 qola medaldardy jeńip aldy. Memleket óz kezeginde senderge únemi qamqorlyq kórsetýde, úzdik bilim alyp, jan- jaqty jetilip ósý úshin barlyq jaǵdaılardy jasaýda. Osynyń barlyǵy senderdiń aqyldy, densaýlyǵy myqty urpaq bolyp qana qoımaı, Qazaqstandy súıýge, ony álemge tanytýlaryńa yqpal etedi, al biz sender úshin maqtanatyn bolamyz. Men búgin senderge júrekteriniń jylýyn usynyp, merekelik konsertke qatysqan barlyq kishkentaı artıserge alǵys aıtamyn», - dep atap ótti Almaty ákimi.
Baýyrjan Baıbek Danelıa Týleshovany ýkraındyq «Golos. Ditı» shoýyndaǵy jeńisimen quttyqtady.
«Ár balanyń jetistigi - bul barsha elimizdiń jetistigi. Danelıa, barlyq qazaqstandyqtar sen úshin maqtanady. Saǵan zor tabystar tileımin, daryndy baladan álemdik deńgeıdegi juldyzǵa aınalýyńa tilektespin. Men seniń anań Elenany da quttyqtaımyn. Ár bala jeńisiniń artynda ata - analardyń, ásirese onyń anasynyń zor eńbegi turady», - dedi Baýyrjan Baıbek.
Balalar úshin «Jańa jyldyq ǵajaıyptar» dep atalatyn merekelik baǵdarlamany sırk artıseri daıyndady, lazer shoýynyń jaryǵymen úıretilgen ańdar, akrobattar, jonglerler, kloýndar jáne basqalary óner kórsetti.
Merekelik shara barysynda qala ákiminiń atynan kishkentaı qonaqtarǵa syılyqtar, sonyń ishinde ata- analary balalaryn baqylap otyratyn elektrondy júıedegi GPS-saǵattar, keńse taýarlary, damý oıyndary, jumsaq oıynshyqtar, grattaj ben sýretshiler úshin jıyntyqtar, tátti syılyqtar jáne basqalary tapsyryldy.
