Nazerke Áriptiń týǵan ápkesi Jazıra Sybanbaeva Facebook áleýmettik jelisinde joǵary sottan sińlisin óltirgen qylmyskerdi ómir boıy bas bostandyǵynan aıyrýdy surap jazba qaldyrǵan dep habarlaıdy Qamshy.kz aqparat agenttigi. 

«Nazerke taksıge otyrǵan. Kólikti kúdikti Isqakov Kýrban júrgizgen. Qylmyskerdi izdeý úshin Qazaqstannyń túkpir-túkpirinen týystarymyz kelse de ony ustaý úshin kóp ýaqyt ketti. Isqakov Kýrban buǵan deıin 3 ret sottalǵan. Onyń ishinde kisi óltirý aıyby da bar, biraq shartty túrde merziminen buryn bosap shyqqan. Isqakov Kýrban Nazerkeni Kensaıdaǵy zıratqa aparyp óltirgeni anyqtaldy. Nazerkeniń denesi 2 aı boıy kúnniń astynda jatyp, buzylǵan. Sońǵy tyńdaýda Isqakov Kýrban 3 aıyppen (zorlaý, qasaqana kisi óltirý, múlkin taptyr alý) kelispeıtinin aıtyp, tek óltirgenin ǵana moıyndaǵan. Biz onyń zańǵa sáıkes óz jazasyn alatynyna úmittenemiz. Ol burynǵydaı jaqsy tártibi úshin erte bosap shyǵamyn dep úmittenip otyrǵan shyǵar. Sebebi burynda solaı boldy ǵoı! Qyzdyń ómirin oıran etti! Ol túrmeden shyqqannan keıin qaıta osyndaı qasirettiń qaıtalanýy múmkin be? Biz onyń ómir boıy bas bostandyǵynan aıyrý jazasyn suraımyz!» dep jazdy Jazıra Sybanbaeva.  

Aıta keteıik, 18 jastaǵy almatylyq Nazerke Árip 10 maýsymda saǵat 16:00-de úıinen shyǵyp, qaıta oralmaǵan. Tek 6 qyrkúıekte qyzdyń óli denesi Keńsaıdaǵy zırattyń mańynan tabyldy. Nazerke Áriptiń ólimine qatysy bar kúdikti ustaldy. Kúdikti Almaty oblysy Talǵar aýdanynyń 1984 jylǵy turǵyny. Bul týraly Almaty qalasy İİD Qylmystyq polısıa basqarmasynyń bastyǵy, podpolkovnık Janbolat Zıadın habarlady.